Ereintzaren tenis irekiaren finalak jokatuko dituzte asteburuan
Bi errenteriar izango dira gutxienez, Ereintzak antolatutako tenis irekiaren finalean: Eneko Millan eta Juantxo Albisu. Lehenengoak, lehenengo kategoriako finala jokatuko du, eta bigarrenak, bigarren kategoriakoa —beste bi kategoria daude, hirugarrena eta laugarrena—.
Bi errenteriar izango dira gutxienez, Ereintzak antolatutako tenis irekiaren finalean: Eneko Millan eta Juantxo Albisu. Lehenengoak, lehenengo kategoriako finala jokatuko du, eta bigarrenak, bigarren kategoriakoa —beste bi kategoria daude, hirugarrena eta laugarrena—.
Larunbatean eta igandean jokatuko dituzte kategoria bakoitzeko finalak, Beraungo erabilera anitzeko pistan. Lehenengo kategorian, Millanek Raul Ramos izango du aurrean. Millanek aurretik Jon Ramos gainditu behar izan du finala bigarrenez jokatzeko. Iaz, Ereintzaren lehenengo tenis irekian, ere bera izan zen finalista. Igandean jokatuko den partida bakarra izango da, 11:00etan.
Bigarren kategorian, berriz, Albisuk oraindik ez daki beste herritar baten kontra —Ivan Jimenez— edo Javier Velascoren kontra jokatu beharko duen. Hirugarren kategoriako finala Juan Ramon del Pozok eta Jokin Ramosen artekoa izango da, eta laugarrenekoan Carlos Artegain eta Mikel Egibar ariko dira nor baino nor. Hiru partida horiek larunbatean jokatuko dira, 10:15etik aurrera.
32 tenislarik parte hartu dute
Ekainean hasi zen txapelketa, eta hilabete eta erdi luze iraun du. 32 tenislari pasatu dira bertatik. Zortzi multzotan banatu dituzte, eta ligaxkak jokatzen joan dira. Ondoren, lehenengo postuan geratu diren sailkatuek euren artean jokatu dituzte final laurdenak, eta bigarren, hirugarren eta laugarren postuetan geratu direnek gauza bera. Maila bakoitzeko onenak sailkatu dira finalerako.
Ereintzak tenisa maite duten guztiak finalak ikustera joatera animatu ditu.
