Oiharan-Erkiaga bikoteak aurrea hartu du zesta puntako munduko txapelketan

admin

Bidasoa

2013/07/09

Partida ikusgarria izan zen eta azkenean gorriak garaile

Joan den ostiralean hasi zen Munduko Pilota Biltzarraren zesta puntako binakako txapelketa Jostaldi pilotalekuan eta Jai Alive enpresak oso balorazio ona egin du gertatu zenaz. Batetik, jende asko zegoelako harmailetan “estreinaldia zela kontuan izanik”, eta bestetik, partida bikaina izan zelako. “Lehen ostiraletan ez da normalean hainbeste jende egoten. Ea hori uda on baten aurrekari izaten den”. Txapelketari hasiera ematen zion partida gogorra eta erakargarria izan zen. Ordu eta berrogei minutuz aritu ziren bi bikoteak nor baino nor eta azkenean gorriz kantxaratu zen bikotea irten zen garaile, Olharan-Ibai Erkiaga, 35-32 emaitzarekin. Aritz Erkiaga-Txasio bikoak ez zuen inoiz partida galdutzat eman eta bigarren fasera sailkatzeko aukera guztiak ez dituzte galdu. Olharan pozik zegoen garaipenarekin, baina onartu zuen ez zela erraza izan: “Partida oso luzea eta gogorra egin zaigu. Txasiok ez zuen hutsik egiten eta Aritz oso ondo aritu da errebotean. Ibaik ere hutsik gabe jokatu du eta partida ikusgarria izan da. Markagailuan ihes egiteko aukera genuen bakoitzean beraiek eusten zioten”. Izan ere, azken markagailuak partidan izandako berdintasuna agerian uzten du, baina tarterik handiena lau puntukoa izan zen eta garaileak atzetik ere egon ziren (23-25). “Garaipenerako gakoetako bat alderdi fisikoa izan zen. Beraiek kinieletatik datoz eta gu ohituagoak gaude partidak jokatzen, ni behintzat bai”, gaineratu zuen Olharanek. Noski, partidako galtzaileak ez ziren hain pozik, baina ezta etsita ere, Aritz Erkiaga esaterako: “Ondo jokatu dugu, egin behar genuena egin dugu, baina ezin izan dugu irabazi. 32 tanto egin ditugu, eta asko dira horiek. Galduz gero, hori zen helburua eta bigarren partidara sailkatzeko aukerarekin joan gaitezke”. Ostiral honetan izango dute Aritz Erkiagak eta Txasiok sailkatzeko, bigarren partida jokatuko baitute Egiguren-Enbilen aurka, 20:00etan. Ostiral honetan bigarrena Hurrengo ostiralean Egigurenek eta Enbilek errepikatuko dute, lehen partidaren irabazleen kontra, ligaxkako azken partidan. Lehen sailkatuak finala jokatuko du eta bigarrena Beaskoetxea-Irastorzarekin lehiatu beharko da final atarikoan. Finalerdia Gernikan jokatuko dute, hilaren 22an, eta Hondarribitik kanpo egingo den partida bakarra izango da. Lehen lehian bezala, txapelketako partida guztien sarreraren prezioa 12 eurokoa izango da eta paella eta ardo dastaketa sartzen da prezioaren barruan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.

Oiharan-Erkiaga bikoteak aurrea hartu du zesta puntako munduko txapelketan

Gipuzkoa

Donostiako Karmengo jaietan jasandako «jazarpen poliziala» salatu dute dozenaka herritarrek

Jon Sarasua euskaltzain oso izateko hautagai izendatu dute

Donostiako Piratek bertan behera utzi dituzte abuztuaren 14ko kontzertuak

Memoria historikoari begiratzeko bi proposamen bateragarri egin dituzte Carla Filipek eta Taxio Ardanazek

Uholdeak gertatu aurretik abisu emateko sistema bat sortu dute Pasai Donibanen

Hernani eta Irun lotzen dituen Renfeko tren zerbitzua etengo dute uztailaren 25etik irailaren 6ra

Bergarako eta Zarauzko autoen ikuskapen zentroetan greba mugagabeari eutsiko diote

Beasaingo Urkiola jatetxeak irabazi du Jakitea elkartearen Juan Manuel Garmendia gastronomia saria

Torreko Hodia ikusgai jarriko dute Ekainberrin, duela 12.000 urte grabatutako pieza bat

Deeptek-Gipuzkoa fundazioak programa bat abiarazi du enpresa zientifikoei laguntzeko

Ertzaintzak Donostiako Karmengo jaietan «herritarren aurka erabilitako indarkeria» salatu du EH Bilduk

Donostiako Karmengo jaietan jasandako «jazarpen poliziala» salatu du besta batzordeak