Gaur goizean aurkeztu dute Euskal Herriko Pintxo Txapelketaren zortzigarren ekitaldia. Urriaren 14tik 16ra egingo dute Hondarribiko Itsas Etxean, eta bertan herrialde guztietako txapelketetako irabazleak izango dira, eta aldi berean, beste parte hartzaileak onartuko dituzte ere (izena emateko epea urrian itxiko dute). Baldintza bakarra bete beharko dute taberna edo jatetxeek lehian parte hartzeko: euren establezimenduan ohikoa izatea pintxoak egitea.
Rio Bidasoa hotelean egin dute txapelketaren aurkezpena. Bertan Hondarribiko Udaleko, Eusko Jaurlaritzako eta Hondarribiko Ostalaritza Elkarteko kideak izan dira. Denek ala denek nabarmendu dute Hondarribiak gastronomiarekin duen lotura, eta pintxoak hartzen ari diren indarra. Hala, pintxoetan “bertako produktuak” lantzeko aukera direla nabarmendu dute, “bertako gastronomia eta bertako produktuak, horiek dira tabernen egunerokoaren giltza, eta txapelketarena”. Turismoa erakartzeko ere balio dutela esan dute gaurko aurkezpenean.
Itsas Etxean egingo dituzte pintxoak, unean-unean, parte hartzaileek. Ikusleek ere bertan izateko aukera izango dute, zuzenean dena ikusten, eta Internetez ere jarraitu ahal izango da lehia. Hiru sari nagusi izango ditu lehiak, eta berritasun gisa, Kutxabanken ekimenez herritar bat epaimahaiko kide izango da.