"Irtenbideak proposatzeko" elkarretaratuko dira Hondarribiko azken ostiralean
Herrirak deituta, hileroko azken ostiralean “preso eta iheslari politikoen aldeko” elkarretaratzea egiten dute San Pedro kalean, 20:00etan. Hil honetan dei berezia, egin dute eta deialdian “soluzioak lagunduko gaituen klima berri bat lortzeko” elkartuko direla esan dute: “Pertsona guztien giza eskubideen errespetutik abiatuta, egoera berri bat lortzeko oztoporik nagusiena Espainia eta Frantziako Gobernuek indarrean mantentzen duten espetxe politika da. Horrekin batera, ezinbestekoa da munduko hamarnaka herrietan barreiaturik dauden ehunka euskal erbesteratuen egoera modu positiboan konpontzea. Herrirak euskal preso eta iheslari politikoei aplikatzen zaizkien salbuespen neurri eta mendeku politikekin amaitzea eskatzen du, baita euren senideek pairatzen duten sufrimendua etetea ere”.
Deitzaileek gogorarazten dute hilaren 15ean Miarritzen “iheslariek konponbidearen bidean ekarpen eta urrats eraikitzailea” eman zutela, “urtetan luzatu den gatazkari irtenbide definitibo bat eskaintzeko bide orrian euren egoerari soluzio positiboa eman behar zaiola aldarrikatuz”.
Halaber, Espainiako zein Frantziako gobernuei jarrera aldatzeko galdegiten diete eta lau eskakizun egiten die Hondarribiko Herrirak: Gaixotasun larriak pairatzen dituen presoak askatzea, bizi osorako zigorraren aplikazioa ahalbidetzen duten salbuespen neurriak indargabetueta zigorra bete duten pertsonak libre uztea, euskal preso guztiak Euskal Herrira ekartzea eta erbestean edo deserrian dauden pertsonekiko jazarpenarekin amaitu eta Euskal Herrian duintasunez bizitzeko duten eskubidea errespetatzea.
