Errenteria-Oreretako gazteak euren egunaren zain
Bi egun eskas falta dira Gazte Egunerako, Errenteria-Oreretan, eta gazteak dagoeneko berotzen hasi dira. Dagoeneko itxi dituzte zerrendak Gazte Olinpiadetan parte hartzeko. Azkenean sei taldek eman dute izena. Gazte Eguna beraiek inauguratuko dute, 10:00etan, Foru plazan. Lehia ondo pasatzearekin uztartzea izango da asmoa.
Egunak, ordea, beste hainbat ekitaldi ekarriko ditu, eta horietako garrantzitsuena bazkaria izango da. Norbait despistatuta badabil, oraindik txartelak erosteko aukera izango du. Landare, Gailur, Sindi, Arkaitza, Manu, Txilintxa eta Laketen daude salgai 12 euroan. Menua ere jakinarazi dute ekitaldia antolatu duten gazteek: makarroiak tomate eta txorizoarekin eta parrillada. Foru plazan bertan egingo dute parrillada. Aurretik, urtero moduan, ekitaldia egingo dute, eta 1995eko Gazte Egunean hil zen Ibon Zabala edukiko dute gogoan.
Eguzkia sartzearekin batera, gau giroan, musikaren txanda izango da, eta bi kontzertu prestatu dituzte: R-Systemtzia eta Sardeska. Goizaldera arte jarraituko du parrandak, eta berbena giroarekin luzatzeko aukera izango da.
Futbito txapelketa
Ekitaldi nagusiak asteburu honetan izango diren arren, joan den asteburuan hasi ziren Gazte Eguneko motorrak berotzen futbito txapelketarekin. Guztira, hamabi taldek parte hartu dute aurtengo ekitaldian, eta garailea Panier taldea izan da.
Egitaraua
- 10:00: Gazte olinpiadak, Foru plazan.
- 13:00: Ekitaldia, Foru plazan.
- 14:00: Bazkaria, Foru plazan.
- 17:00: Poteoa eta txaranga, herrian barrena.
- 22:00: Kontzertua, Foru plazan: R-Systemtzia eta Sardeska.
