Ingurumen arloko diru laguntzak eska daitezke
Mendi eta Ingurumen Departamenduak lehenengo aldiz egin du deialdia ingurumen arloko diru laguntzak eskatzeko. Zehazki, iraunkortasun, ingurumen eta landa garapeneko laguntzak dira, eta uztailaren 15era arte egin ahal izango da eskaera. Dirua irabaztea xede ez duten erakunde eta elkarteei zuzenduta daude euren ekintzak garatu ahal izateko.
Hainbat agiri aurkeztu beharko dira eskaera egiteko: diru laguntza eskaera elkarte edo erakundeko ordezkari batek sinatuta, identifikazio fiskaleko kodea, Eusko Jaurlaritzaren Elkarte eta Erakundeen Erregistroan izena emanda egotearen ziurtagiria; Identifikazio Fiskaleko Kodearen fotokopia, erakunde edo taldearen estatutuak, diruz laguntzea nahi den programa edo ekintzaren memoria zehatza (epeak, metodologia, helburuak, baliabideak, aurreikusitako parte hartzea) eta diruz laguntzea nahi den programa edo ekintzaren aurrekontua.
Elkarlana egiteko bide
Jose Manuel Ferradas Mendi eta Ingurumenko delegatuak esan du dirua irabaztea xede ez duten erakunde eta elkarteekin elkarlana egiteko bide dela, “bertakoen bizitza kalitatea babestu eta hobetzen baitute euren ekintzen bidez”.
