Aitor Renteria, Baiona / BERRIA
Hendaiako ikastola berria hartu behar zuen egoitzaren eraikuntza deliberoa bertan behera utzi du Patrick Dallennes Baionako suprefetak. Paxkal Indo Seaskako lehendakariak harriduraz hartu du berria. «Ez dugu oraindik ikusi auzapezari igorri dion gutuna; beraz, ez dakigu zertan oinarritzen den, zuzen, eraikuntza debekatzeko». Bigarren aldiz, Baionako suprefetak agindua eman du eraikuntza hori gelditzeko. Nahiz eta suprefetak borondate ona duela iragarri, hartzen dituen jarrerak ulertezinak direla erran du Seaskak. Azkenean, ikastola egitea lortuko balitz ere, urte batzuetako atzerapena eraginen du suprefetaren erabakiak.
Harriduraz hartu du berria Indok. Harriduraz eta haserre. Oraingoan ikasturtea bukatzen ari den unea hautatu du suprefetak debekua emateko. Baina haren agiria ikusi arte Seaskak ez daki zertan oinarritu den. Erran diotenaren arabera, herri lurren erabilpen desegokia omen da estakurua. Suprefetak gutunean dioenez, omen, eraikuntza egiteko hautatu duten orubean etxebizitza sozialak egin beharko lirateke. Hendaiako Herriko Etxeak, aldiz, suprefetaren lehen debekua saihesteko asmoz, gune horretan aisialdi gune bat egitea deliberatu zuen, eta han kokatu zuten ikastola. Suprefetaren aginduaren ondotik, adituek aztertu beharko dute zer egin daitekeen orain, baina auzapezak berak hasieran pentsatzen zuen bigarren egitasmoak Estatuaren oniritzia zuela. Errealitateak erakutsi du ez dela horrela gertatu.
Hendaian berean gauzak ez dira sinpleak izan. Battitta Salaberri auzapezaren zerrendako zortzi hautetsik, UMP alderdikoak, ikastolaren aurkako helegitea igorri zioten suprefetari.
![Otsailaren 3an egin zuten Hendaian ikastolaren aldeko manifestazioa](http://bidasoa.hitza.eus/site/files/2013/06/hendaiako_ikastolaren_alde-300x199.jpg)
Otsailaren 3an egin zuten Hendaian ikastolaren aldeko manifestazioa
Erantzuna prestatu
Indok jakinarazi du lehenik suprefetaren arrazoiak irakurri beharko dituztela, eta ondoren Hendaiako auzapezarekin bildu nahi dutela. Hendaiako ikastolako gurasoek ere elkartu beharko dute, eta seguruenik erantzunen bat eman beharko diote, ikastola gisa, Herriko Etxearekin batera, edo Seaska gisa. Aztergai dute.
Egutegiak baldintzatutako unean jakinarazi du agindua suprefetak. Lizeoko ikasleek astelehenean hasten dute baxoa, bertzeak etxean dira jadanik. Lehen mailetako ikasleek ere aurki bukatuko dute. Haserrea nagusitu da Hendaiako gurasoen artean, baina sasoi txarra da mobilizatzeko. Alta, opor garaian mobilizazioetara deitu izan du Seaskak lehenago ere.