Bustia, baina "kalitate handikoa" izan da Erdi Aroko Azoka
Antolatzen hasi zirenetik eguraldi bustienetakoa izan du aurtengo Erdi Aroko Azokak. Larunbatean egin zuen euri gehien eta horrek asko mugatu zuen bisitarien kopurua. Igandean atertu zuenean, aldiz, herritarrek Alde Zaharreko kaleak bete zituzten. Horregatik, balorazio positiboa egin dute udaletik.
Lupe Olaskoaga Turismo zinegotziak azokaren “kalitatea” nabarmendu du: “Kalitate handia egon da, parte hartu duten guztien aldetik. 80 erakusle zeuden, arotzak, errementariak, upelgileak, urreginak, harginak eta nola ez, saltinbankiak, titiriteroak, malabaristak eta juglareak”.
Eguraldiak asko baldintzatu du azokaren bilakaera eta jendea atertu zain zegoela antzeman da. “Larunbata egun osoan oso eguraldi txarra izan genuen, eta horrek beti izaten du eragina, asko murrizten delako jendearen presentzia. Igandean aldiz, azken ordurarte ez zuen euririk egin eta egun ederra izan zen, jende asko bertaratu baitzen, giro bikaina sortuz”, gehitu du zinegotziak eta eskerrak eman die azoka antolatzen lagundu duten guztiei: “Partehartzaile zuzenak, antolatzaileak, langile eta nola ez, Alde Zaharreko bizilagunak ere, denen artean Hondarribia Erdi Arora bueltatzeko lana egin bait dugu”.
Udaletik gogorarazi dute abian dela Erdi Aroko Azokako Argazki Lehiaketa. Lanak aurkeztu nahi dituztenek uztailaren 3ra arte dute epea. BAZ bulegoan aurkeztu behar dira argazkiak eta, zalantzaren bat edukiz gero, bertara jotzea da onena.
