Espetxea eta erbestearen ondoren ere, babesa
http://youtu.be/Ixr9LsLnFyQ
http://youtu.be/Ixr9LsLnFyQ
Errepresaliatuak etxeratu eta gero zer? Galdera horren gainean gogoeta egin dute gaur eguerdian Harrera Elkarteak deituta hogei bat oiartzuarrek. Harreraren izenean aritu dira udaleko areto nagusian Jon Ugarte eta Juan Karlos Ioldi Harrerako kide eta preso ohiak, elkartearen aurkezpenean. Harrera, izaera nazionaleko elkarte asistentziala dela azaldu du Ioldik, eta helburua berriz, errepresaliatuak etxerako bidea egiten dutenean “laguntza eta babesa” eskaintzea dela gaineratu du Ugartek: “Izan ere asko hitz egiten dugu presoek bizi duten egoeraz espetxe barruan edo erbesteratuez, baina etxera itzultzen direnean, egokitzeaz, dituzten beharretaz ez dugu hitz egiten”. Harreraren bidez beraz, etxeratzerakoan errpresaliatuek izan ditzaketen beharrak asetzea bilatzen dute, neurri batean bederen: “Osasun arazoak direla, hainbat tramite kudeatzeko garaian, edo lan munduan integratzen laguntzeko”. Izan ere, 30urte kartzelan eman dituen lagunak utzi zuen herria eta espetxetik aterata aurkituko duena ez dela bera izango nabarmendu du Ugartek, “lagundu egin behar zaio”, gaineratu du.
Errealitate horri erantzuteko antolakuntza iraunkorra sortzeko beharra zegoela ikusi zuten hainbat preso ohik. Xede horrekin, sortu zela Harrera orain urte bete azaldu dute Ioldik eta Ugartek. Elkarte hori Euskal Herriko herri guztietara zabaltzeko lanean ari dira orain, eta horretarako gaurko Oiartzungo hitzaldiaren antzekoak Oarsoaldea zein Bidasoko gainontzeko herrietan antolatzeko asmoa azaldu dute, “zertan ari garen jakinarazteko tokian tokiko herritarrei eta babesa jasotzeko, zein baliabide ekonomikoak lortzeko”.
Elkarteak hiru zutoin dituela agertu dute halaber. Lehenak, koordinazioari eskainitakoak, herrika eta auzoka preso ohiak zein egoeratan dauden detektatzeko lanean dihardu. Arlo Administratibo juridikoaz arduratzen da bestea: “Subsidioa jasotzeko egin beharrekoak, osasun txartela tramitatu edo gida baimena berritzeko zein urrats eman behar dituzten azaltzen diegu bertatik”. Hirugarrena eta azkena, lana eta formazioaz arduratzen dena da.
Helburuez ere aritu dira, “3.000 bazkide beharko genituzke”. Bidean dira, baina oraindik orain ez dute lortu, eta horren harira konpromisoa eskatu diete Oiartzunen bildutako lagunei: “Urtebetean 1.300 bazkide lortu ditugu eta ez da gutxi, baina oraindik falta da 3.000 horietara iristeko”. Bazkidetza egiteko esku orriak ere banatu dituzte hitzaldian bertan. Bazkide izan nahi dutenek hura bete eta Oiartzungo preso ohi bati eman beharko diote harek bidera dezan. 60 eurokoa da urteko kuota.
