Bilboko erailketa matxistaz
Joan den igandean gure belarri eta begietara heldu zen berria ekarri nahi izan dut hona. Honen inguruan sortu den albiste jarioa eta iritzi kontrajarrien inguruan zenbait kontutxo aipatu nahiko nituzke.
Alde batetik, medioetan gertaera honi gertakizun lazgarri edo gertaera ilun izena jarri diote. Iluna eta lazgarria denik ez dut zalantzan jartzen inongo momentuan, baina honen aurretik indarkeria matxista edo indarkeria sexista terminoak ez dira inon azaltzen, eta hori da niri atentzioa eman didan lehen kontua. Deigarriagoak diren gizonaren arte martzialetako jakinduriak egoera honek oinarrian izan duen indarkeria matxista ahaztera garamatza. Emakume izateagatik, bera baino eskubide gutxiago dituela pentsatzeagatik erailtzen saiatu zen emakume bat, eta gutxienez beste baten gorpuzkinak ere aurkitu dituzte.
Eraso hau matxista izan da, eta ziur nago askok ideia honekin bat egingo duzuela. Legearentzako, oraindik ere, eraso hauek matxista bezala identifikatzeko bikote harreman bat egon behar du. Baina badakigu ez dela soilik horrelako egoeratan ematen indarkeria mota hau, gogoratu Nagore Laffagen kasua, adibidez. Heriotzetaraino heltzea ez da ere derrigorrezkoa indarkeria matxistaz hitz egiteko, baina gaur, gai hau alde batera utzi beharko dut.
Bestalde, aipatzekoa iruditzen zait erasotua izan zen emakumearen lanbideaz sortutako polemika. Egunkari gehienek bi aldiz pentsatu gabe sexu langilea zela aipatu dute. Ez dut argi kasu honetan nik zer egingo nukeen, alde batetik, bere lanbidea adierazteak eraso hau nolabait justifikatzeko erabili baitezakete batzuek. Hain zuzen, zenbait hedabidek norabide horretan aipatu dute prostituzioan aritzen zela: mundu ilun eta liskartsu batean, «zer espero zuen ba emakume horrek? Normala da hori gertatu izana!». Prostituzioak edo honetan aritzeak ez du inondik inora justifikatzen gertatutakoa.
Baina bere lanbidea ez aipatzeak, kazetarion aldetik, estigmatizazioan sakontzea ekarriko ote zuen sentipena dut ere. Esan nahi dut, baduela bere garrantzia prostituzioan aritzeak. Gizon horrek, emakume hauek oraindik eta azpibaloratuago izan ditzake, hain zuzen lan honetan aritzeagatik. Eta honek ere matxismotik badu asko.
Sexu Langileen Nazioarteko Eguna izan zen ekainaren 2an, eta egunean bertan eraso honen berri izan genuen. Lanbidearen inguruan, eta haien baldintza eta segurtasunaren inguruan hausnartzeko tartea zabaldu beharko genukeela uste dut. Berriro gerta ez dadin.
