Bosgarren edukiontzia jartzeko eskatu du Errenteriako PSE-EEk
Errenteriako PSE-EEk bosgarren edukiontziaren alde egin du beste behin, eta udal talde guztiei elkarlanean aritzeko deia luzatu die: “Donostian akordioa lortu badute, ez genuke ulertuko zergatik Errenterian ez, baldin eta udal gobernuaren interesak beste batzuk ez badira”. Azken aldian, Bilduk hondakinak biltzeko sistemaren harira, “jarrera aldaketa” eduki duela adierazi du PSE-EEk, “atez atekoaren inposiziotik beste sistema arrazoizkoagoen alde eginez, eta udal bakoitzean duen indarra kontuan hartuta”.
Hondakinak gaika biltzeko sistemarik onena bosgarren edukiontzia dela argi du PSE-EEk, “merkeagoa, erosoagoa, garbiagoa, jasangarriago, intimitateari eraso egiten ez diona eta herritarrek nahiago duten sistema” dela iritzita. Izan ere, bosgarren edukiontziak “kontsentsu eta herritarren gaitzespen gutxiago” jasotzen duelakoan da. Horrekin batera, gehien birziklatzen duten familientzako hobariak proposatu ditu talde sozialistak.
PSE-EEren arabera, “garaiz” da oraindik materia organikoan Europak zehazten duen araudia betetzeko, Gipuzkoako Hondakinen Planak ezarritako arauak “saltatu” gabe.
