Energiaren kontsumoa izan dute hizpide ikasleek

admin

Bidasoa

2013/05/31

Ikasleak euren azalpenak ematen

Haurtzaro zein Elizaldeko ikasleek energiaren kontsumoaren inguruan lan egin dute. Eskola Agenda 21en barruan egin dute lanketa eta aztertutakoa udalean aurkeztu dute gaur. Gaia landu eta gero ikasleek eurek hartu dituzten konpromisoak azaldu dizkiete Aiora Perez de San Roman alkateari eta Oihan Tello alkateordeari; alkateak, gainera, hartu dituzten konpromisoak “asko” direla nabarmendu du. Konpromisoak hartu bakarrik ez, eskatu ere eskatu dituzte, besteek ere energiaren kontsumoa gutxitzeko pausoak eman ditzaten. Hamaiketakoa tupperretan sartzera konprometitu dira, baita bertako produktuak kontsumitzera, argia behar ez denetan itzaltzera eta hortzak garbitzerako garaian txorrota ixtera ere. Udalari eguzki panelak jartzeko eskatu diote eta garraio elektrikoei garrantzia ematea, besteak beste. Alkatea gustura agertu da ikasleen konpromiso zein eskaerekin. Momentu honetan udalak auditoria energetikoak egiten ari dela azaldu du, hau da, bonbillak aldatu eta kontsumo baxukoak jarri, farolak aldatu, zaharkituta daude ur-hodiak aldatu… Ikasleek aztertutakoa eta ondorioztatutakoa elkarteekin partekatu duela esan du alkateak, “haietako askok ez dute zuek duzuen kontzientzia”, adierazi du.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.