Gipuzkoako Kopa irabazi du La Bacaladerak
La Bacaladera Hondarribia eskubaloi taldeak Gipuzkoako Kopa irabazi zuen atzo Andoaingo Allurralde kiroldegian, Donibane Eskubaloia taldearen kontra (27-25). Finala izanik, nahiko lehia estua izan zen, eta markagailuan ez zen alde handirik egon. Horrela, atsedenaldira 14-11 iritsi ziren, hondarribiarrak aurretik zirela. Aldageletatik erasokorrago atera ziren sanjuandarrak, 6-0eko defentsarekin, eta partida bukatzeko ordu laurden falta zenean, bi goleko aldearekin jarri ziren aurretik. Bi minuturen faltan, baina, hondarribiarrak gol batengatik aurreratu ziren. Arrosek ez zuten asmatu azkeneko erasoaldian, eta La Bacaladerakoek eraman zuten kopa.
Aurrekariak
Ezusteko garaipena izan zen nolabait, hondarribiarrak goragoko maila batean dauden arren —Euskal Ligan dago La Bacaladera eta Lurraldeko 1. Mailan, Donibane—, azken fasera sailkatzeko ligaxkan sanjuandarrek garaitu zituztelako berdeak.
Ligaxkako talde berean aritu ziren hondarribiarrak zein sanjuandarrak eta hor arrosak nagusitu ziren (23-26). Donibanek jokatutako hiru partidak irabazi zituen eta Hondarribiak bakarra. Leizaran eta Urnietarekin berdinduta amaitu zuen La Bacaladerak ligaxka, eta sartu eta jasotako golei esker sailkatu zen finalerdietara.
Azken faserako, beraz, ozta-ozta sailkatu zen Hondarribiko taldea, baina azken bi partidetan maila eman zuten, finalerdietan aurrena, eta atzo finalean, Gipuzkoako Kopa irabaziz. Finalera iristeko Urola Aranzadi erraz gainditu zuen La Bacaladerak finalerdietan (26-35). Donibanek ere ez zuen zailtasunik eduki finalera sailkatzeko; Gabaz Elgoibar menderatu zuen (27-17).
