Otxoteek hartuko dituzte Errenteria-Oreretako kaleak igandean
Niessen elkarteak hirugarrenez antolatu du Errenteria-Oreretako otxoteen jaialdia, Errenteria Hiria III. Otxote Topaketa, etzirako (igandea). Sei otxotek parte hartuko dute, eta eguerdian herriko sei tabernak (Batzoki, De Cyne Reyna, Desira, Juli, Leku Zarra eta Maite) jasoko dituzte abesbatza taldeen emanaldiak, baina txandatan banatuta. Horrela, 12:45ean, sei otxoteek taberna banatan emanaldia egingo dute. Gauza berbera egingo dute, baina tabernaz aldatuta, 13:15ean eta 13:45ean. Ondoren, bazkaria egingo dute Niessen elkartean, eta arratsaldean, 18:00etatik aurrera, denek elkarrekin emanaldi berezia egingo dute Errenteria Hiria Kulturgunean (sarrera doan da).
Aizkoa (Baiona), Ertizka (Donostia), Karnaba (Errenteria-Orereta), Lur Maitea (Bilbo), Nayabe (Irun) eta Txorbela (Arrasate) izango dira herrian kantatuko duten otxoteak. Alberto Mendigutxia Nissen elkarteko kideak atzoko aurkezpenean horietatik bi nabarmendu zituen, Irungo Nayabe emakumeen otxotea delako, eta Bilboko Lur Maitea, “urrunetik datozelako”. Alta, datozen ekitaldietarako Euskal Herriko herrialde guztietatik etorritako abeslari taldeak lortu nahiko lituzketela esna zuen Mendigutxiak, eta horren aldeko ahalegina egingo dutela. Gainera, antolatzaileak esan zuen eguna antolatzeko “ahalegin handia” egiten dutela, horrelako jaialdi bat antolatzeak “diru asko” behar duelako. Nahiko lukete otxote gehiagok parte hartzea jaialdian, baina diruaz gain, toki arazoa ere badagoela esan zuten.
Otxoteen espiritua
Hirugarren ekitaldia izanda ere, Niessenek otxoteen topaketarekin duen helburua da abeslari talde horien espiritua berreskuratzea. Tabernetan kantatzeko ohitura galtzen ari dela uste dute, eta hori berreskuratu beharra dagoela Horregatik topaketa. Bide horretan Felix Lopezi omenaldia egingo diote egunean zehar, eta Kulturguneko ekitaldian bereziki. Otxoteen espiritua barne-barnean zuen horietakoa zen Lopez, lanetik atera eta tabernetan kantatzen hasten zen horietakoa, “beti giro ona jarriz, izaera jatorrekoa, atsegina. Gogoa eta nahia adierazten zen. Gozada bat zen”, esan zuen atzoko aurkezpenean Alberto Mendigutxiak. Iaz zendu zen.
