400 boluntario baino gehiagok dute festa antolatzeko ardura; Alarde Tradizionalaren aldeko festa hasteko GordeZAN taldeko emakumeek moztuko dute zinta
Alardealdiaren antolatzaileak, gaurko aurkezpenean
Alarde Tradizionalaren aldeko Alardealdia festaren hamabosgarren ekitaldia ekainaren 2an egingo dute, igandea. Bertan bilduko duten diru guztia alarde hori finantzatzeko izango da. Goizeko bederatzietan hasiko da, Urdanibia plazan, eta hasierako ekitaldi horretan GordeZAN taldeko emakumeek moztuko dute festa abiatzeko zinta. Antolatzaileek, gainera, nabarmendu dute 400 boluntariok lagunduko dutela jaia ondo ateratzeko, eta milaka parte hartzaile espero dituztela. Gaur goizean aurkeztu dute, Urdanibia plazan.
Jai ibiltaria da Alardealdia. Ekimenaren alderik garrantzitsuena Irundik zehar egingo den martxa da. Hala, 09:00etan abiatuko da Urdanibia plazatik, eta Arbesetik zehar Aldaberaino iritsiko da. Handik Meakarako bidea egingo du martxak, Ibarburutik eta Larreaunditik pasatzeko. Urdanibian bukatu du ibilbidea martxa horrek. Bide guztian zehar atsendelekuak izango dira, jakiekin eta edariekin. Ibilbidean zehar trikitilariak, txistulariak, dantzariak, banda, txarangak eta abesbatzak girotuko dute eguna, eta goiz osoan zehar txu-txu trena ere izango da, Santa Elena kaletik aterata. 11:15ak aldera bukatuko du bidea martxak, eta amaieran Irungo elkarteek egindako pintxoak dastatzeko aukera izango da.
Horrez gain, Irungo hainbat tokitan Alarde Tradizionalarekin lotutako gaiak erosteko aukera izango da: baloiak, eskumuturrekoak, pontxoak linternak, banderak… 14:30ean herri bazkaria egingo dute Urantzu pilotalekuan. Txartelak 22 euroan daude salgai honako tokietan: Haizea taberna, Geno mertzeria, Bidasoa altzariak, Irun sarraila dena, Jaizkibel paperdenda, Amalen paperdenda, Ongi Etorri taberna, Irungo Atsegiña taberna, Sargia taberna eta Manolo taberna. Bazkaria luzatu nahi dutenek 22:30ak arte dute horretarako aukera, bitarte horretan musika eta bestelakoak izango baitira Urantzun.
Haurrentzako ere
Haurrengan ere pentsatu dute Alardealdiaren antolatzaileek. Hartara, haurren gunea ere jarriko dute Larreaundin puzgarriekin, eta hainbat tailerretan parte hartzeko aukera izango dute. Zalditxoan ibiltzeko aukera ere badute. Urdanibian ere jarriko dituzte puzgarriak, eta alardearen pertsonaiak irudikatzen dituzten buruhandiek agerraldia egingo dute.
5-12 urte arteko haurrek Bidelagun ekimenarekin gozatzeko beta izango dute. Pasaporte antzekoa da Bidelagun (martxaren hasieran lor daiteke, Urdanibian), eta martxaren atsedenleku bakoitzean galdera bati erantzun beharko diote parte hartzaileek, eta ondoren, zigilua jarriko diete pasaporte horretan. Erantzun guztiak zuzen dituztenen artean Ipod bat zozkatuko dute (Urdanibian entregatu behar da pasaportea). Irabazlearen izena bazkarian jakinaraziko dute.
