Elizalde Herri Eskolaren Eguna ospatuko dute igandean
Igande honetan, hilak 19, Elizalde ikastetxean euren eguna ospatuko dute eta horretarako egun osoko egitaraua prestatu dute.10:00etan hasiko da jaia, Lartaun txistulari taldeko kideekin eta gero trikitilariekin euren bat egingo dute. Ordu berean, ikasleen krosa hasiko da Kontsejuerreka kaletik eta judo erakustaldia ere egingo dute zenbait ikaslek tatami gelan.
10:30etik 12:30era, ikastetxeko ateak zabalduko dituzte eraikinak zein ikasleen lanak ikusteko. Horietako bat Ipuin bat mila irudi erakusketa da. Ikasleek taldeka Luis Eduardo Auteren Ilargilorea ipuinaren inguruan artelanak egin dituzte.
10:45ean, Elizaldeko Abesbatzak emanaldia eskainiko du ikastetxeko Mediatekan. Bertan ikasleek ikasturtean zehar landutakoa erakutsiko dute.
11:30ean, euskal dantza erakustaldia izango da eta aterpean xake partidak eta tailerrak egingo dituzte. Geroago, 12:15ean, gimnastika erritmikoko eta hip-hopeko taldekideek emanaldia eskainiko dute.
Goizari bukaera emateko, hainbat ekitaldi prestatu dituzte. Ikasleen emanaldiaz gain, Ane Otxotekori omenaldia egingo diote. Gero, euskal dantza tailerretan aritu diren gurasoek bi dantza eskainiko dituzte eta bukatzeko, Elizalde Herri Eskolako ereserkia aurkeztuko dute. Musika Anaitz Arozena gurasoak egin du eta bertsoak Aingeru Palomo irakasleak.
Arratsaldean gehiago
Eguerdian DBH 3. mailako ikasleek antolatutako bazkaria egingo dute. Bazkalondoan eta arratsalde osoan zehar, haur zein gazteentzako jolasak eta puzgarriak izango dira eta 17:00etan dantzaldia izango da Modestoren eskutik.
Horrez guztiaz gain, taberna egun osoan zehar martxan egongo da. Elizalde ikastetxetik adierazi dutenez, euria eginez gero, eskolako patioan egitekoak ziren emanaldiak Elorsoro kiroldegian egingo dituzte.
Elizalde ikastetxekoen emanaldia, kiroldegian
