Buruhandiak margotu dituzte Haurren Eguna biribiltzeko
Hondarribiko Gazte Asanbladak antolatutako IV. Haurren Eguneko bigarren saioa egin zuten larunbat goizean Gipuzkoa Plazan. Aurreko igandean prestaturiko buruhandiak margotu zituzten eta hondakinekin musika tresna gehiago sortu zituzten, baita tiragomak ere.
Arrakastatsua izan da laugarrenez gazteek haurrentzat prestatu duten jolasteko jardunaldia eta aurten hainbat berritasun izan ditu, haien artean lehen aldia izan dela haurrek beraiek sortu dituztela jolasak.: “Hondakinekin egindako buruhandien eta musika tresnen tailerrak antolatu ditugu, jostailuak egin ditzaten eta euren artean jolas dezaten. Beste urteetan guk ekarri ditugu jolasak, eta aurten erabaki dugu beraiek sortzea jolas horiek”, azaldu du Xabi Bengoetxea asanbladako kideak.
Hala, jolastea eta ingurumenarekiko kontzientzia uztartu ditu aurten Hondarribiko Gazte Asanbladak Haurren Egunerako. Ez da lehen aldia gaia lantzen dutela eta horretan eredu izan nahi dutela dio Ibinka Lete gazteak: “Norberak bere gain hartu behar du egiten dituen gauzen ardura, kontziente izan behar du, eta zikintzen badu, zikindu duen hori garbitzea garrantzitsua dela jakin behar du. Guk gurea horrela egiten dugu, eredugarri izan nahi dugu, gauzak ondo egin”.
Eta etorkizuneko gazteak oraingo haurrak direnez, balore horiek haurrei irakasteko probestu dute ekimena, modu praktikoan gainera. “Askotan eskoletan teoria asko ematen da, arbelean gauzak oso txukun jartzen dira eta saiatzen dira ikasleei hitzekin irakasten. Horrek balio du, baina umeekin gehiago balio du ekintzak, pragmatikoa izatea eta haurra zikinaraztea, eta erakustea zaborretatik hartutako hodi batekin, iogur batekin eta plastiko puska batekin jolasak, musika tresnak egin daitezkeela”, gehitu du Bengoetxeak.