Errenteriako Udalak eta EAJk Batzoki zaharraren gaineko akordioa egin dute
Errenteriako Udalak eta EAJk Batzoki zaharraren orubearen gaineko aurreakordioa egin dute. Horren arabera, udalak 800.000 euro ordaindu behar dizkio alderdiari Gamon Zumardiaren eta Agirre Lehendakaria plazaren artean dagoen lur sailaren jabe egiteko, eta horrez gain, egungo Batzokiaren lokala (Esmalteria plazan dago), eta udal jabegoko beste bi (Batzokiaren ondoan daude) emango dizkio. Orotara, ia 1,5 milioi euroko operazioa izango da. Aurreakordioa behin betikoa izateko Hirigintza batzordeak lehenik, eta Udalbatzak ondoren berretsi behar dute. Batzokiaren eraikina 2006an eraitsi zuten.
Julen Mendoza alkateak atzo esan zuenez, aurreakordioa “positiboa” da. Izan ere, EAJk egin zuen balorazio batean, orubearen prezioa 4,1 milioikoa zen, eta 2006an udalak agindutako beste balorazio batean 2,6 milioikoa zen horren balioa. 2006an udalean zeudenek 200.000 euro jarri zituzten espropiazio prozeduraren berme antzera.
Aurreakordioa ontzat eman arren, aurreko gobernu taldeek jarrera “arduragabea” izan dela esan zuen Mendozak. Izan ere, alkatearen arabera, udalaren egoera ekonomikoa 2006an oraingoa baino “askoz hobea” zen, eta aurreko agintariei leporatu zien gaia behar bezala ez lantzea, “ondorengoei aurre egiteko herentzia txarra utzi digute”. Alkateak zehaztu zuenez, 2006an udalaren aurrekontua 66 milioi eurokoa izan zen, eta 2013an 46koa da.
Ordainketak
2015ean hasiko da udala EAJri 800.000 euroak ordaintzen, 200.000 euro urteko. 2014an, aurretik jarri ziren 200.000 euroekin itxiko dute ordainketa, hortaz, 2015, 2016 eta 2017 urteetan 200.000na euro ordainduko dizkio Errenteriak EAJri. Modu horretara ordaintzeak aurrekontuetan “desorekarik” ez duela sortuko nabarmendu zuen alkateak.
