Gazte Asanbladako kide bat, haurrei buruhandiekin laguntzen
Beste behin, arrakastatsua izan da Hondarribiko Gazte Asanbladak aurten laugarrenez antolatutako Haurren Eguna. Berrogeitahamar haur inguru elkartu ziren atzo arratsaldean Gipuzkoa Plazan,
Berrerabili, zaborrik ez sortu, hondakinekin jolastu! leloarekin prestatutako ekintzetan parte hartzera.
Hala, hondakinez baliatuta, eta Gazte Asanbladako kideek eta gurasoek lagunduta, buruhandiak eta musika tresnak prestatu zituzten herriko haurrek. Ez zuten lana bukatu, bi egunetan banatu baitute 2013ko Haurren Eguna. Datorren larunbatean goizez elkartuko dira (11:00etan), batetik, buruhandiak margotu eta, bestetik, atzo sortutako musika tresnekin kontzertu bat ematen saiatzeko. Gazte Asanbladako kideen iritziz, “haurrak etorkizuna dira eta ingurumena zaindu behar dela ikasi behar dute, etz zer hobe modu praktikoan ikastea baino”.
“Ingurumenarekin eredugarri izan nahi dugu”
Laugarren urtea bete du Haurren Egunak eta hiru berritasun izan ditu. Batetik, bi egunetan banatu dituzte ekitaldiak, bestetik, jolasak haurrek beraiek sortzen hasi dira eta, azkenik, ingurumenari lotutako ekitaldia izan da. Baina ez da lehen aldia Gazte Asanbladak bere jardunean ekologia kontuan izan duena. Beraientzat, ingurumena zaintzearen beharra zerbait pertsonala da eta “zorrotzak” izan nahi dute horrekin.
Zer dela eta hasi zineten Haurren Eguna antolatzen?
Xabi Bengoetxea: Gu gazteak gara eta etorkizuna gazteena dela esaten dugu. Baina etorkizuna gazteena izan dadin, haurrek joan behar dute pixkanaka parte hartzen, batez ere elkarrekin. Guk ikusten dugu egungo haurrek, haur parkean ez bada, ez dutela elkarrekin jolasten eta kanpoko jolasak galtzen ari direla.
Gernikako (Bizkaia) gaztetxekoek aurten buruhandien tailerra egin dute eta asko gustatu zaigu zer egin duten, eta hondakinen gaiarekin uztartzeko balio zuenez, hondakinekin egindako buruhandien eta musika tresnen tailerrak antolatu ditugu, jostailuak egin ditzaten eta euren artean jolas dezaten. Beste urteetan guk ekarri ditugu jolasak, eta aurten erabaki dugu beraiek sortzea jolas horiek.
Helburua, birziklatu baino lehen hondakin asko berrerabili daitezkeela erakustea…
X. B.: Askotan eskoletan teoria asko ematen da, arbelean gauzak oso txukun jartzen dira eta saiatzen dira ikasleei hitzekin irakasten. Horrek balio du, baina umeekin gehiago balio du ekintzak, pragmatikoa izatea eta haurra zikinaraztea, eta erakustea zaborretatik hartutako hodi batekin, iogur batekin eta plastiko puska batekin jolasak, musika tresnak egin daitezkeela. Soinua ateratzen dute eta etxera joaten dira kontent-kontent gurasoei belarriak gozatzera.
Laugarren urtea izan du Haurren Egunak eta aurrekoak bezala arrakastatsua izan da.
Ibinka Lete.: Bai, Oso pozik gaude jendeak emandako erantzunarekin eta espero dezagun horrela jarraitzea denbora luzerako.
Asko zaintzen duzue ingurumena herriko jaietako abordaian, mendian garbitzen izan zarete… Zergatik zaudete hain tematuta ingurumenarekin?
X. B.: Nik uste gai horrekin pixka bat zorrotzak izan behar dugula, herri honetan gauza askorekin politika egiten delako oso erraz. Gazte Asanbladarekin serioski hasi ginen lehen urtean, Jaizkibeleko superportuaren gaia landu genuen urtebetez, eta geroztik kontzientzia hartu dugu, baina ez Gazte Asanblada bezala, baizik eta pertsona bezala pentsatzen dugun zerbait delako, eta ahal den heinean aportatu behar dugula uste dugu. Ezin dugu onartu kutsatzea eskubide bat izatea eta txikiei hori erakutsi nahi diegu, euren esku dagoelako etorkizuna nolakoa izango den.
I. L.: Bai, norberak bere gain hartu behar du egiten dituen gauzen ardura, kontziente izan behar du, eta zikintzen badu, zikindu duen hori garbitzea garrantzitsua dela jakin behar du. Guk gurea horrela egiten dugu, eredugarri izan nahi dugu, gauzak ondo egin.
