Kai zaharra jendez bete nahi du Herrirak hilaren 18an
Hilaren 18an M#18 Plazara nazio ekitaldia antolatu du Herrirak, preso eta iheslarien eskubideak bete daitezen aldarrikatzeko. Euskal Herriko 200 herri baino gehiagoko plazak jendez bete nahi dituzte egun horretan, eta Hondarribian ere saiatuko dira. Helburua, kai zaharra betetzea eta argazki jendetsua ateratzea izango da, baina horren aurretik eta ondoren izango dute zer egiteko, Herrirakoek hainbat ekintza prestatu baitituzte.
Amutetik bizikleta martxa egingo dute eta Portuko kaleak kalejira batekin girotuko dituzte, eguerdirako ahalik eta jende elkartzeko xedez. 13:00etan izango da ekitaldi nagusia, kai zaharrean egingo duten argazkia. Iaz dozenaka lagun bildu ziren bertan eta aurten gehiago izatea nahi dute.
Ekitaldi sorta ixteko, paella erraldoia prestatuko dute Santiago kalean jateko. Bazkaltzen geratu nahi dutenek izena eman behar dute aldez aurretik. Bi aukera dute, telefonoz egitea (639504727 zenbakira deituta), edo posta elektronikoz idaztea. Muara elkartearen tabernan ere izango dira tiketak salgai. Bazkariaren prezioa 18 eurokoa izango da.
M#18 Plazara Hondarribian
- 12:00etan, bizikleta martxa Amutetik.
- 12:30ean, kalejira San Pedro kaletik abiatuta (Azken Portu).
- 13:00etan, argazkia kai zaharrean.
- 14:30ean, bazkaria Santiago kalean.
