"Burujabetza eta aldaketa soziala" aldarrikatuko ditu EH Bilduk M-1ean
Biharko Langileen Egunean kalean izango dela adierazi du EH Bilduk, eta bi aldarrikapen nagusi izango ditu: eraldaketa soziala, eta hori lortzeko, burujabetza “politikoa nahiz ekonomikoa” zehaztu du: “Aspalditik frogaturik dago erabakitze esparruak zenbat eta hurbilago egon herriarengandik, demokraziak kalitate eta dentsitate handiagoa duela. Errazagoa dela agintea bera kontrolatzea erabakiguneak Euskal Herrian izanda Madrilen edo Parisen egon ordez. Horixe da Euskal Herriak eskatzen duena”.
Herritarrak mobilizazioetan parte hartzera deitu dituzte, batik bat, langileei dagokielako euren eskubideak eta interesak defendatzea, “kapitalaren erasoaren aurrean”. Hala gogorarazi du gogor jo duela krisiak Euskal Herria, eta zehazki, Errenteria-Orereta. “Langabeziak nabarmen egin du gora, eta hainbat lantokiren itxiera hurbiletik” ikusi duela esan du EH Bilduk.
Krisia areagotu duten neurriak Paris nahiz Madrildik datozela esan du, eta hala, Zapaterok hasietako erreformak (“murriztaileak izanagatik batzuk EAJk abstentzioari esker onartu ziren”) PPk jarraitu dituela esan du: “Ekimen zentralizatzaile erasokorrean sistematikoki jardunez” ari dela esan du, “defizita dago horren atzean… baina ez aurrekontuetakoa demokratikoa baizik”.
Espazioak ireki behar direla adierazi du, eta “errepublikanismoa” aipatu du hor: “Ez gara gobernu sistemaren dikotomiaz bakarrik ari. Ahalduntzeaz. Herritarrok eskubideez gain, betebeharrak ere baditugu…. egunerokotasuna baldintzatzen diguten erabakietan parte hartzearena lehenik eta behin”.
