Pasaiako Udaleko Gazteria eta Kirol Sailak jakinarazi du udaleku irekietarako izena emateko aukera maiatzaren 2an zabalduko dutela, 13ra arte. 2003 eta 2010 urteen artean jaiotakoentzako udako zerbitzua da, Pasaian erroldatuta dauden edo Pasaian ikasten duten haurrentzat. Denera 360 plaza daude, hortaz, bertan izan nahi dutenek ahalik eta azkarren izena eman behar dutela jakinarazi du udalak; plaza horiek gainditzen badira, eskatzaileen artean zozketa egingo da.
Matrikula 74,90 eurokoa da, eta haurraren izena agirian jarrita egin behar dute ordainketa parte hartu nahi dutenek, honako kontu korrontean: 2095 5400 02 1061652334 (Kutxabank). Ordainketa agiria izanda, matrikula orriarekin batera egin behar da eskaera ofiziala, eta osasun txartelaren fotokopia ere eman behar da. Pasaian ikasten ari direnek ikastetxean bertan aukez ditzakete agiri horiek, eta besteek, Gazteria eta Kirol Sailera jo behar dute (Trintxerpeko Euskadi etorbideko 61. zenbakian).
Uztailaren 1etik 30era izango dira udaleku irekiak, 09:30etik 13:00etara, astelehenetik ostiralera. Taldeak 10 eta 12 haur bitartekoak izango dira, talde bakoitzeko begirale banarekin. Hainbat jarduera egingo dituzte bitarte horretan, tailerrak, jolasak, txangoak eta bestelakoak.
Informazio gehiago 043 00 43 00 telefono zenbakira deituz edo
udalaren webgunera sartuz lor daiteke.
