Maiatzaren 1erako "konpromisoa eta borroka" eskatu du LABek
Langileen Eguna “emergentzia sozialeko egoera” batean emango dela iritzita, Oarso Bidasoko LABek Oarsoaldeko eta Bidasoko herritar zein langileak maiatzaren 1ean egingo dituen mobilizazioetan parte hartzera deitu ditu. Zorion Ortigosa LABeko Oarso Bidasoko ordezkariak beharrezkotzat jo du denen “konpromisoa eta borroka aldaketa soziala eta politikoa benetan gauzatzeko”. Are gehiago, burujabetza politiko baterako bidean, “pausoak emateko momenturik egokiena” dela esan du.
Hala, maiatzaren 1ean Oarsoaldean zein Bidasoan mobilizatuko da LAB. 11:00etan auto karabana aterako da Irundik (Mosku), eta 12:00etan manifestazioa egingo dute Errenteria-Oreretan, Zumarditik abiatuta.
Langileen egoerari dagokionez, langabezia zein orain arte egindako lan erreformak “lan merkatua guztiz desarautzen eta gazteak etorkizunik gabe uzten” ari direla adierazi du Ortigosak. Arlo sozialean, berriz, pobrezia, etxe kaleratzeak, eta “desnutrizio kasuak ere” aipatu ditu. Egoera horretara erabaki politikoak “botere ekonomikoa daukatenen menpe” hartu direlako iritsi dela esan du LABeko ordezkariak, “irtenbiderik ematen ari ez diren politikak martxan jarriz”.
Greba orokorra
Aurtengo maiatzaren lehena, greba orokorraren barruan kokatu behar da. Maiatzaren 30erako egin du deialdia Euskal Herriko gehiengo sindikalak, LAB barne. Grebak bi bide dituela azaldu du Ortigosak, “erasoei erantzutea, Espainiako Gobernuak ostiral honetan murrizketa gehiago egingo dituela iragarri duela kontuan hartuta”, eta eragile nahiz sindikatuen arteko elkarlana bideratzea.
