Patrick Bousquet-Schneeweis-ekin literatur topaketa, Hendaian
Patrick Bousquet-Schneeweis idazlearekin literatur topaketa egingo dute ostiralean Hendaiako Mediatekan, 18:30etik aurrera. Apirilean Irakurketa bere forma guztietan ekimena aurrera eramaten ari dira Mediatekan, eta horren barruko ekimena da ostiralekoa. Liburuak ere sinatuko ditu sortzaileak, bere azkena hain zuzen: La balle rouge. Duela gutxi Le piano sur le plage liburua argitaratu zuen, eta bertan Paris eta Hendaia artean gertatzen den istorioa kontatzen du.
Idazle emankorra da Bousquet-Schneeweis. Haur zein helduentzako eleberriak idatzi ditu, ipuinak, eta olerkiak, komikientzako gidoiak, edo kantuak. Historia zalea da ere, eta bere eleberrien gaiak munduko bi gerren gainekoak izan dira batez ere.
Bere eleberriak behin baino gehiagotan sarituak izan dira: Shootings eta Les neiges de l’enfer liburuek Raconte moi l’histoire Gazte Saria lortu zuten 2012an eta 2008an; La Banquise a croqué le Chat noir lanak Irakurle Gazteen Vosges-etako Literatura saria irabazi zuen 2006an; eta Chance, les ailes de la Liberté eleberriak Aumale herriko kolegioen saria (2009an) eta Pays Boulageois-ko Gazte Saria (2012) lortu zituen.
