Hondarribiak zazpi domina lortu ditu Okzitanian eta Irungo Santiagotarrak taldeak beste hiru
Hondarribia Arraun Elkarteak (HAE) hiru urrezko domina jantzi zituen asteburuan Cazaubon herrian (Okzitania) egin zen aulki mugikorreko Nazioarteko Estropadan. Gazte eta kadete mailetako gizonen zortzikoan eta emakume nagusien lemazainik gabeko laukoan lortu zituzten garaipenak. Horiez gain, helduen zortzikoak zilarra lortu zuen eta brontzea hiru ontzik: mutil kadeteen lemazainik gabeko lauko ontziak, neska gazteen bikoak eta gazteen mailako lauko sculleko mutilen ontziak.
Arraun elkartetik oso pozik geratu ziren emaitza horiekin eta 8+ ontzietan lortutakoa nabarmendu du Edorta Kanpandegi HAEko ordezkariak: “Azpimarratzekoa da gizonen zortzikoen emaitzak, proba erregina izanik, kadete eta gazteetan urreta eta seniorretan zilarra lortu baikenuen”.
Helduen Mailan Aviron Bayonnais eta Raspas taldeek osatutako ontzi mistoak irabazi zuen zortzikoen proba, Hondarribiari 2 segundo ateraz. “Hirugarren Orio geratu zen, Hondarribiarengandik hiru segundo eta erdira. Emaitza hau ikusirik datorren larunbatean Orion jokatuko den Gipuzkoako Txapelketan lehia oso estua espero da bi ontzi hauen artean”, gaineratu du Kanpandegik.
Beste hiru domina irundarrentzat
Irungo Santiagotarrak Kirol Elkarteko arraunlariek ere izan ziren Cazaubonen, 12 ontzirekin eta lan oso ona egin zuten beraiek ere. Irundarren lemazainik gabeko lauko kadeteak urrezko domina lortu zuen eta brontzea emakume kadeteen skiff ontziak eta emakume helduen lauko scull ontziak.
