Oiartzun ibaiko presa eraikitzeko prozesuarekin ez dator bat Eguzki
Oiartzun ibaian berriro eraikitzekoak dira 2011ko uholdeekin kaltetuta geratu zen presa. Eguzki talde ekologista, ordea, presa berriro eraikitzearen kontra azaldu da, eta batik bat hori erabakitzeko aurrera eraman den prozesuarekin. Gaia nola bideratu den “zalantzan” jartzen duela esan du. Eguzkiren arabera, gaien irtenbideetan gizartearen, eta “bereziki lan horretan diharduten taldeen parte hartzea” ezinbestekoa da, baina kasu honetan udalak erakutsitako jarrerak ez duela hori errespetatu. Hala, udalari, etorkizunera begira jarrera hori aldatzeko eskatu dio.
Uholdeek presa botatakoan, Eguzkik aukera bikaina ikusi zuen ibaia presa gabe uzteko “Europako, Estatuko eta bertako araudiak betez”. Hori guztia azaltzeko harremanetan jarri zen gaiarekin zerikusia daukaten alde guztiekin, “udala, URA agentzia, aldundia, udal taldeekin eta Fanderiako auzo elkartearekin”. Lehen harremanean denak Eguzkiren proposamenarekin bat egiten zutela esan du talde ekologistak.
Hala ere, garai horretan (2012 abendua-2013ko urtarrila) aldundiak presa berriro eraikitzeko proiektua egina zuela azaldu du, baina Eguzkiren esanetan, Bilduko ordezkariak “dena hitzez” egiten ari zirela esan zien.
Bi hilabeteren ondoren, martxoaren 26an elkartu ziren hurrena, eta Eguzkik “atsekabea” hartu zuela adierazi du, “erabakia hartua zegoelako jadanik, gure eskaera guztiei muzin eginez”.
