Hondarribiak hasi zuen bezala bukatu nahi du liga
Pazko asteko atsedenaldiaren ondoren ligara itzuliko dira Lurraldeko Ohorezko Mailako futbol taldeak eta haien artean baita Hondarribia ere. Mikel Llorenteren jokalariek liga hasiera bikaina egin zuten eta, gabonen ondoren hain ondo moldatu ez ziren arren, lehen itzulian pilatutako puntuei esker aurten ez dute mailari eusteko zailtasunik izango, multzoko erdialdetik ez baitira inoiz jaitsi.
Trintxerpen jokatuko dutegaur, 16:30ean, eta hirugarren garaipena jarraian lortzen saiatuko dira. Liga hasierako jokoa erakutsiz gero eta partida batzuetan fata izan zaien zortea alde izanez gero, zazpigarren postuari eusteko aukera izango dute berdeek eta, zergatik ez, gora begiratzeko ere. Izan ere, seigarren tokian dagoen Berio taldeak bost puntu ateratzen dizkio Hondarribiari, baina gaur Bergararekin eta datorren jardunaldian Hernanirekin jokatuko dute donostiarrek, biak ala biak aurkari oso gogorrak.
Baina besteek egiten dutena baino lehen, Hondarribiak bereari begiratu behar dio, Trintxerperi irabaztetik hasita. Pasaitarrak azkenaurreko tokian daude eta gol gehien jasotzen dituen taldea da. Hori probestu nahiko dute hondarribiarrek Don Bosco zelaian.
