Presoen aldeko pankarta kentzeko eskatu du Errenteriako PSEk
Duela egun batzuk jarri zuten Errenteriako udaletxean Giza eskubideak. Irtenbidea. Bakea. Euskal Presoak Euskal Herrira leloa duen pankarta udaletxeko balkoi batean, eta Errenteriako PSE-EEk kartel hori kentzeko eskatu dio Julen Mendoza alkateari. PSE-EEren ustez, kartelak herriaren irudia “kaltetzen” du, “baita herrian dauden beste sentsibilitate batzuk ere, kontuan hartuta herritar guztien ordezkari izanik modu berean errespetatu behar dituela denak”.
Halaber, udala “ezker abertzalearen eskaeren erakusleiho” bihurtu dela iritzi dio PSE-EEk, “gotorleku duina izan eta herritarrekiko errespetua erakutsi behar duenean”.
PSE-EE “ahaleginak” egiten ari dela esan du “lehenengo dinamikak hautsi eta elkarbizitza normalizatu giroa sortzeko”. Horrelako ekimenak, ordea, “azken aldian lan egin duten logikaren kontrakoak” direla esan du: “Gure herriaren etorkizuna alderdien arteko harremanen eraginpean badago, ekintza horiek ez dira onargarriak”.
PSE-EEk “aurrera egin” nahi duela esan du, baina “ezberdinen arteko konfiantza lortzeko ez dute tokirik halako aldebakarreko ekintzek”.
