Iritsi da traktorea!
Arraztalo elkarteak egindako kanpainak lortu du helburua: iritsi da traktorea Oiartzuna. Atzo egin zuten aurkezpen ofiziala Doneztebe plazan.
Pozik daude Arraztaloko kideak jarritako xedea lortzera iritsi direlako. Pedro Del Olmo kideetako batez azaldu duenez, orain errazago egin dezakete lana: “Lehen bizpahiru egun pasatzen zituzten langileek baratze bateko lurrari buelta emateko, orain goiz batean ia dena egin dezakete”. Langile horiek, gainera, “pozez txoratzen” daudela dio, lanak azkarrago egiteaz gain, hobeto egin ditzaketelako. Traktoreak zama arindu die eta, gainera, autonomia eman.
Astelehenetan, 18:00etan, kontsumo taldeko 30-35 kideei beraiek barazkiak banatzen dizkiete. Haiek ere harro daude lortutakoarekin: “Beharrezkoa zen erreminta hori lortzea. Makinarik gabe prozesu guztia luzeagoa eta nekagarriagoa zen. Orain, ea lortzen dugun kontsumo taldea handitzea eta jende gehiagorengana iristea”.
Horretan dabiltza. Hirugarren baratza bat lortu dute Ergoienen 500 metro karratu ingurukoa, Bide Alde jatetxearen ondoko aparkalekuaren atzealdean. Beste bat ere badute Ergoienen, 1.500 metro karratukoa. Eta hirugarren Kazkazuri plazaren ondoan dago, plaza inguruan (3.500 metro). Helburua, langile gehiagorekin barazki ekologiko gehiago ekoiztea da, eta interesdunen itxaron zerrenda murriztea. Izan ere, 30 pertsona edo familiatik gora daude itxaron zerrenda horretan.
Produktu eta kanpaina gehiago
Del Olmok jakinarazi duenez, kanpaina gehiago egiteko asmoa dute. Hala, orain arteko laguntza eskertu die herritarrei, baina adi egoteko ere eskatu die, aurrerantzean ere laguntza beharko dutelako. Bitartean, barazki ekologikoak ez ezik, sagardo ekologikoa ere lantzen jarraituko dute.
Bestalde, gogorarazi dute, astelehenetan ez dituztela barazkiak bakarrik banatzen Doneztebe plazako hitzorduan. Bertan, arrautzak, ardi esnea, gazta eta ezti ekologikoa eskuratzeko aukera ere badute kontsumo taldeko kideek. Horrez gain, bertatik pasatzen diren interesdun guztiek Arditurrin egindako ogia ere eros dezakete.
Arazoa, plazara
Arraztaloren helburu nagusia, gaixo psikikoei eta euren familiei laguntzea da, eta gaixoak gizartean eta lan munduan integratzea. Azken finean, orain arte etxean geratzen zen arazo bat plazara ateratzen ari dira.
Horri esker, langileak eurak ere ohartu dira zer egiteko gai diren, eta asko asko hobetu da euren egoera. Autonomia, ilusio eta konfiantza gehiago dute.
Iñaki Artola monitorea, bi langilerekin
