Oihana Etxebarrieta: "Hasi ginenean baino gehiago gara"
Gaur kalera ateratzeko eguna da. Emakume langilearen nazioarteko egun honetan aldarrikapena eta festa eskutik helduta joaten dira askotan, eta haserre edo izututa egoteko arrazoiak ditugun arren, gaur ondo pasatzera aterako gara ere, merezi dugulako.
Egoera ez da ideala, ez gaude parekidetasun batean (batzuek hala sinestarazi nahi diguten arren), oraindik salatzeko egoerak bizi behar izaten ditugu emakumeok, zein gizonek. Oraindik lortzeko eskubide asko dauzkagu eta aldatzeko bizi(o)molde asko. Emakumeok ez dugu gure gorputzen gaineko kontrol osoa, jaietan ezin dugu modu berean parte hartu, lan beragatik soldata baxuagoa kobratzen jarraitzen dugu, emakumeak hilak, bortxatuak eta jipoituak dira, publizitatean gure irudi eta gorputzak erabiltzen dira…
Krisiak gainera lortutako apur hori galtzeko arriskuan jarri gaitu. Jada lan merkatuan genuen egoera txarra bazen areagotu egingo da hau, prekarietatea, lanaldi partzialak, amatasunagatik kanporatzeak… Gainera, oraindik ere etxetik kanpo egiten den hori kontsideratua izango da bakarrik lan bezala, eta zaintza lana askoz gutxiago baloratzen jarraituko da…
Hala ere, hasi ginenean baino gehiago gara, eta hori ospatu behar dugu. Herrietan geroz eta neska feminista gazte talde gehiago aurki ditzakegu, Ernai gazte antolakunde berriak ere, adibidez, bere helburuetan Euskal Herria Sozialista eta Feminista eraikitzea txertatu du, gazte asanbladetan gaiak presentzia dauka, eta zenbait lanketa antolatzen dira, elkarlanean egitarau oparoak antolatzen dira Martxoaren 8aren gainean…
Mugimendu feminista indarra hartzen dabil, baina beste elkarteek ere lan hori beraien egunerokotasunean txertatu izana pozteko modukoa da. Pixkanaka, baina aurrera goaz!
Garai batean emakumearen bozka eskubidea onartzen ez zuten horiek, gaur egunean emakumeek jaietan parte hartzearen kontra edo abortatzeko eskubidearen kontra daudenak dira. Hemendik urte batzuetara, historiara pasatuko direnak. Feminismoa, aldiz, horrelako jarrerak atzean utzi eta aurrera egiten jarraitu duen mugimendu bezala pasatuko da historiara.
Gaur egun duguna ez galtzeko lan egin behar dugu, eta bitartean aurrera egiten jarraitu. Gaur hori ikusarazi behar dugu, baina duguna eta lortuko dugun hori ere ospatzeko eguna izan behar du. Alaitasunetik eta elkarlanetik ere lan egiten dakigulako.
Zorionak guztioi! Ondo pasatu gaurko eguna, gozatu, indarrak hartu eta aurrera egin! Eta eskerrik asko, urte hauetan guztietan, honaino heltzea ahalbidetu duzuenoi.
