The Big Theory Band-ek joko du etzi Oiartzunen, Inude eta Artzainen harira
Asteburu honetan aterako dira Kaldereroen, eta Artzain eta Inudeen konpartsak Oiartzungo kaleetara. Azken herria izango da ohitura hori jarraitzen, berez inauteriak iragartzeko izaten baitira ekimen horiek.
Konpartsez gain, astebururako egitarau zabala antolatu du Iñaki Gurrutxaga Ibargain Musika Eskolako irakasleak, udalarekin eta herriko hainbat elkarterekin elkarlanean. Elkarlan horri esker, etzi kontzertua emango du herrian The Big Theory Band talde ezagunak.
Egitaraua honakoa izango da:
Larunbata, martxoak 2
- 11:15etik 11:30era: Inude eta Artzain Nagusiei Ohorezko Banda jarriko diete, udaletxeko areto nagusian. Bertan izango da Asier Legorubur Kultura zinegotzia. Aurten Inude nagusia Haurtzaroko ikasle Maider Iparragirre izango da, eta Artzain nagusia Xabier Otxoteko Elizaldekoa.
- 11:30etik 13:00etara: haur jolasak eta puzgarriak, Doneztebe plazan. Gurrutxagak iragarri duenez, haur guztientzat opariak ziango dira.
- 18:45ean: Kaldereroen Konpartsa aterako da Aialde kaletik, eta ijitu ezkontza egingo dute Doneztebe plazan.
- 20:45ean: The Big Theory Band taldearen kontzertua, udaletxeko arkupeetan (Kastro Berri tabernaren laguntzari esker). Benetako Big Band-a da, 17 profesionalez osatutakoa, eta denetariko instrumentuekin: saxo altua, saxo tenroea, saxo baritonoa, tronpetak, tronboiak, prekusioa, teklatua, baxu elektrikoa, eta abeslaria. Kontzertuetan arrakasta handia lortu du orain arte, Donostiako Aste Nagusian, esaterako.
- 09:00etan: Elizalde auzoan zehar, dianak: Auntxa Trikitixa Eskolaren eta Lartaun Txistulari Taldearen eskutik.
- 11:15ean: Inude eta Artzainen Konpartsa aterako da Aialde kaletik. Konpartsaren parte izango dira herriko hainbat elkarte ere: Oiartzungo erraldoiak, Ibargain Musika Eskola, Oiartzungo danborrada, Lartaun Txistualri Taldea, Haurtzaro Dantza Taldea, Elizalde Dantza Taldea, Auntxa Trikitixa Eskola, pilota eskola, futbol eskola, jostailu fanfarrea eta Oiartzungo dultzaineroak. Antolatzaileek zehaztu dute, gainera, sorpresaren bat izango dela, baina horretarako konpartsa ikustera gerturatu beharko dute oiartzuarrek. Parte hartzera ere animatu dituzte.
- 13:00etan: desfilea bukatuko dute, udaletxean bandera jarriz. Hitz batzuk esango dituzte Legorburu zinegotziak eta Artzain eta Inude nagusiek.
