Epailea protagonista izan da Hondarribiaren porrotan
Hondarribia futbol taldeak Beriorekin galdu zuen larunbatean (0-1), Ohorezko Mailako 22. jardunaldian. Partida borrokatu batean, epailea izan zen protagonista nagusia. Harmailetan bildutako zaleek gogor kritikatu zituzten bere erabakietako batzuk eta Mikel Llorente etxekoen entrenatzaileak “jokalariekiko errespetua” eskatu zuen partidaren amaieran.
25. minututik aurrera hamar jokalariz aritu zen etxeko taldea eta Llorente kexu zen, hori baino hamar minutu lehenago gertatu zen jokaldi bortitzago batean Berio taldeko jokalariak txartel horia baino ez zuelako ikusi. Bat gutxiagorekin egon arren Hondarribiak dena eman zuen, eta 67. minutura arte eutsi zion hasierako markagailuari. Baina Gorkak sartutako golaren ondoren, Beriok partida kontrolpean izan zuen.
Porrotaren ondoren sailkapeneko zazpigarren postuan jarraituko du Hondarribiak, baina seigarren den Bergarak zazpi puntuko tartea ireki du. Zorionez, atzetik segika dituen hiru taldeetatik Tolosa izan da asteburuan punturik lortu duen bakarra —bina berdindu zuen Ondarroan—, eta Hondarribiak eutsi egin zio zazpigarren tokiari. Hondarribiak 31 puntu ditu, Tolosak 30, eta Touringek eta Aloña Mendik 29na.
Hori bai, datozen jardunaldietan gauzak asko aldatzen ez badira, zazpigarren postu horretan bukatzea izan daiteke berdeen helburua ligarako. Iaz sufritu zutena eta gero ez legoke gaizki zazpigarren bukatzea, baina 2012-2013 denboraldiko lehen itzulian egindako lanagatik sari hobea beharko luke herriko taldeak.
