Pasaia Garbia: "Pozik gaude udalak ez duelako atez atekoa inposatuko"
Pasaia Garbia plataformako kideek Pasaiako gobernu taldeak 2013ko aurrekontuen harira emandako datu bat erabili dute herrian atez ateko hondakin bilketa sistema ez dela jarriko esateko. Datu hori Antxoko batzarrean eman zuten gobernu taldeko kideek, eta esan zuten 2013ko udal kontuen zirriborroan atez atekorako diru partidarik ez zegoela aurreikusia, aurten sistema hori ezartzeko hasierako inbertsioa egiteko finantzazio aukerarik ez duelako, “nahiz eta atez atekoa indarrean dagoenean, dirua aurreztuko dugun”. Hala gobernu taldeko kideek jakinarazi zuten atez atekoaren gaineko parte hartze prozesua abian jarriko dute aurten, eta 2014an jar daitekeela bilketa sistema abian. “Prentsan agertu den albiste horren gaineko oharra” bidali dute Pasaia Garbiako kideek, eta bertan honakoa nabarmendu dute: “Pozik gaude udalak ez duelako atez atekoa inposatuko”.
Hori esanda, plataformako kideek nabarmendu dute “arrazoi” dutela esaten dutenean atez atekoa garestia dela, “atez atekoa aurrekontu faltagatik ez ezartzeak bere garestitasuna agerian besterik ez du uzten, guk salatu dugun moduan”. Hala. sistema “deserosoa eta zikina” ere dela gaineratu dute, eta bildu dituzten 4.247 sinaduren “izenean” lanean jarraitzeko asmoa dutela jakinarazi dute, “aipatu sistemari oposizioa azalduz, eta bosgarren edukiontzia aldarrikatuz, aukera merke, eroso eta garbiagoa delako”. Salatu dute Bildu ez dagoela “birziklatzearen alde”, eta “beraien sistema inposatzea lortzen ez duten bitartean” pasaitarrek ezin izango dutela organikoa bereizi.
