Sarea konfiguratuko dute gaur eta datorren astean antenak jarriko dituzte
Gaur hasi dira Guifi.net komunikazio sare librea konfiguratzen Hondarribian. Sustatzaileek diotenez, “sare azkarra, libre eta neutrala” da Guifi.net eta Gazte Asanbladaren eskutik iritsiko da herrira. Azken hilabeteetan
Krisiaren aurrean alternatibak goiburuarekin hainbat ekitaldi antolatzen dabil Gazte Asanblada, eta horietako bat da Guifi.net sarearen ingurukoa. Gaurko goizerako, sarearen oinarrizko konfigurazioa eta lehenengo antenak jarri nahi zituzten eta une honetan Muara elkarteko guneko konfigurazioa ezartzen ari dira; ondoren egingo dute Olagarrokoa.
Eguraldi txarragatik gaur ez dituzte antenak jarriko, baina beharrezko instalazioa bai ezarriko dutela esan digu Asier Garaialde sarearen sustatzaileetako batek: “Haize handia dabil eta antenak ezin dira gaur jarri, baina datorren astean jarriko ditugu”. Lehenengo antenak Muara eta Olagarro elkarteen egoitzetan jarriko dituzte, biak alde zaharrean, baina urtarrilaren 24an emandako hitzaldi-tailerrean sarea hedatzeko ineteresa agertu zuten bertaratutakoek.
Gaurko egitaraua
- Goizean: auzolanean antenen instalazioa egingo dute, Olagarro elkarteko eta Muarako teilatuetan.
- 14:30ean: bazkaria Olagarron. Txartelek bost euro balio dute.
- Kafea eta gero: Ordenadoreak askatu izenburupean tailerra egingo dute. Bertan, software askearen instalazioa egingo dute, eta hainbat aplikazioren gaineko informazioa emango dute. Ordenadoreak eramateko eskatu dute.
