'Emaztegaiaren semea' filman oinarritutako obra Itsas Etxean, igandean
Hilaren 3an (igandea), Emaztegaiaren semea antzezlana taularatuko dute Itsas Etxea Auditoriumean, 19:30ean. Izenburu bereko fiman oinarrituta dago eta Ados Teatroa konpainiaren eskutik dator. Sarrerak 10 euroan salgai daude tursmo bulegoetan eta nahi duenak emanaldia baino lehenago eros ditzake Itsas Etxeko leihatilan.
Emaztegaiaren semean bizitzaren zati bat besterik ez da erakusten, hondatzeko zorian dagoen gizarte batean, non edonola ere bizitzen jarraitzeko eta maitasunari eusteko indarrak atera behar diren. Rafaelek, protagonistak, balore eta ekonomia krisialdi latz batean murgildua, eguneko 24 orduak ematen ditu bere aitak irekitako jatetxea aurrera atera nahian. Dibortziatuta dago, oso gutxitan ikusten du alaba, ez dauka lagunik eta neska-lagunarekin konprometitzeari ihes egiten dio. Gainera, aspaldi ez da zahar-etxe batean Alzheimerrak jota dagoen ama ikustera joan. Baina gurasoen maitasun istorioa eta haurtzaroko lagunminaren berragerpena bere bizitzaren lema berreskuratzeko pizgarriak izango dira.
Zuzendaria: Garbi Losada.
Aktore taldea: Asier Hormaza, Kandido Uranga, Iñaki Irastorza, Sara Cozar eta Mikel Laskurain.
