Urteko lehen udalbatzarra lasai hasi zen atzo Errenteria-Oreretan. Zinegotziek bost puntuko gai ordena zeukaten eztabaidatzeko, eta horien artean, PSE-EEk eta EAJk aurkeztutakoa, udalak proposatu dituen kultur ekipamenduei buruz. Aho batez onartu zuten zinegotziek kultur ekipamendu horiei buruzko txosten bat egin eta gaia landuko duen batzorde bat osatzea. Hala nola, udal liburutegia, Arteleku, euskal jantzien museoa eta aterpetxearen beharrak landuko dituzte bertan.
Horrez gain, udalak ekipamendu horien inbertsioen berri eman beharko du, baita egokitze eta mantenimendu kostuena ere. Halaber, zenbat denboran egingo diren ere jakinarazi beharko du.
PSE-EEk eta PPk arlo horretan informazioa emateko eskatu zioten alkateari, eta Jose Manuel Herzog PPko bozeramaileak, gainera, kudeaketan gardentasunik ez izatea egotzi dio gobernu taldeari. Julen Mendoza alkateak erantzun zien gaia argi geratu zela bozeramaileen batzordean, eta horrez gain, beste taldeekin hitz egiteko prest azaldu da.
Gainontzeko puntuetan garraioa izan zen gai nagusia. Batetik, Herribusi kontratua luzatzea onartu zuten, eta bestetik, berriz, Gipuzkoako garraio publikoan tarifak bateratzeko sistema ezartzeko lankidetza hitzarmena sinatzea eta Herribusen ere tarifak bateratzeko sistema ezartzeko lankidetza hitzarmena sinatzea.
Azkenik, galdera eskaeren tartean, Jose Angel Rodriguez PSE-EEko bozeramaileak Inauterietako egitarauaren gaineko argibideak eskatu zituen, batetik, udalaren irudia ez agertzeagatik eta bestetik, herrian landuko den gaia
Orereta bezala agertzeagatik. Irune Balenziaga Kultura zinegotziak onartu zuen udalaren irudia ez sartu izana, eta akats bat izan dela arrazoitu zuen. Gaiari dagokionez, herriko eragileek proposatutako egitaraua izan dela adierazi zuen, eta horrenbestez, bera ez dela inor gaiari izena aldatzeko.
