Stop Kaleratzeak: “Kutxabankek ez ditu etxegabetzeak utzi”
Bidasoko Stop Kaleratzeak taldeak elkarretaratzea burutu zuen joan den ostiralean Irungo Colon pasealekuan, Kutxabankek duen sukurtsalaren atarian. Bertan, finantza erakundeak “bere hitza bete ez” duela eta “etxegabetzeekin jarraitu” egin duela salatu zuten.
Izan ere, ostiralean Luis Mari Manterola irundarra etxetik kanporatzeko agindua zegoen eta ez Stop Kaleratzeak taldeko Ruth Lopezek azaldu zuenez, ez zen gauzatu Manterolak pisua alokatuta zuelako. “Plataformaren lanari esker eta Irungo Epaitegian errekurtsoa jarri duten abokatuei esker, kaleratzea atzeratzea lortu dugu”, adierazi zuen Lopezek. Gainera, Irungo sarrailagile guztiek beraien aldarrikapenekin bat egin zutela eta kaleratzeak burutzeko sarrailirik ez aldatzeko konpromisoa hartu dutela jakinarazi zuen.
Bihar beste enkante bat
Bihar, asteazkenarekin beste irundar baten etxebizitza enkantean jarriko dute Irungo epaitegian. “Familiarik gabeko 77 urteko emakume baten etxebizitza da. Caixabankek etxetik bota nahi du”, azaldu zuen Bibi Liras etxegabetzeen kontrako taldeko ordezkariak: “Caixabankek eskatzen diona etxebizitzaren balioa hirukoizten du”, gehiu zuen. Horregatik, elkarretaratzea egingo du bihar Stop kaleratzeak Bidasoa taldeak epaitegien kanpoaldean.
