Elkarretaratzera deitu du Stop Kaleratzeak-ek beste desjabetze prozedura bat salatzeko
Bidasoko Stop Kaleratzeak mugimenduak Flor Grijalba Irungo bizilagunaren aurkako desjabetze prozedura salatzeko elkarretaratzera deitu du bihar, asteazkenarekin. 10:00etan finkatu dute hitzordua kolektibokoak Irungo epaitegian, “Flor Grijalbaren etxebizitzaren enkantea aurreikusia dagoen lekuan”.
Mugimenduko kideek azaldu dutenez, “enkantearen arrazoia 39.000 euro inguruko zorra da”, eta horren ondorioz 197.000 euroko balioa duen Grijalbaren etxebizitza eskuratu nahi duela Caixabankek zehaztu dute. “77 urteko emakume bat izanik, bere errentarekin bizi da eta bere ondasun bakarra den etxebizitza desjabetu nahi dute”, gaineratu dute.
Stop Kaleratzeak kolektiboko aholkulari eta abokatuarekin batera izan da Grijalba Caixabanken, etxea galdu aurretik irtenbide bat bilatzen saiatzeko. Hala ere, jasotako erantzuna beti “ezezkoa” izan dela diote elkarteko kideek. Hala, Caixabanken nahia etxebizitza eskuratzea eta Grijalba kalean uztea dela diote kideek. Familia zuzenik ez duela ere salatu du kolektiboak.