Sei gazteetatik bosten epaia berretsi du Auzitegi Gorenak
Auzitegi Gorenak berretsi egin du Oreretako bost gazteri Auzitegi Nazionalak jarritako zigorra, eta Xabier Lujanbiok, Arkaitz Anzak, Ion Aitor Alberdik, Maitane Linazasorok, eta Aitor Francok espetxera joan beharko dute. Iosu Arruabarrenaren errekurtsoa onartu zuen Gorenak. Atzo eguerdian jakinarazi zuen auzitegiak errekurtsoaren gaineko erabakia. Auzipetuen abokatuak orain dela bederatzi hilabete jarri zion epaiari helegitea, eta duela bi aztertu zuen Auzitegi Gorenak. Edozein momentutan jakinaraztekoak ziren, eta atzo eman zuten horren berri: espetxeratzeko agindua dutenek sei urte eta sei urte eta erdi arteko zigorrak bete beharko dituzte. Pasa den urtarrilean jakinarazi zuen Auzitegi Nazionalak Oarsoaldeko hamazazpi gazteen gaineko epaia, iazko uztailean epaiketa egin ondoren. Horietatik 11 absolbitu zituzten, eta seiri kartzela zigorrak ezarri zizkieten, epaiaren arabera betiere, “talde terroristako kide” izatea leporatuta. Lujanbiori sei urte eta erdiko zigorra ezarri zioten, eta gainontzekoei seinakoa. Fiskaltzak auzipetu guztientzako zortzina urteko espetxe zigorrak eskatu zituen, eta AVTk, berriz, zortzi eta hamabi urte arteko zigor eskaerak. Auzipetuek orduan salatu zutenez, “torturetatik lortutako autoinkulpazioen frogekin” zein jazarpenekin epaitu zituzten. 2008an atxilotuak 2008ko apirilean eman zuen Fernando Grande Marlaska Espainiako Auzitegi Nazionaleko epaileak Oarsoaldeko 22 gazte atxilotzeko agindua, “Segiko kide izatea” leporatuta. Horietako hamar, apirileko polizia operazioan atxilotu zituzten eta beste hamar, Donostiako Auzitegian aurkeztu zirenean, urte [...]
Auzitegi Gorenak berretsi egin du Oreretako bost gazteri Auzitegi Nazionalak jarritako zigorra, eta Xabier Lujanbiok, Arkaitz Anzak, Ion Aitor Alberdik, Maitane Linazasorok, eta Aitor Francok espetxera joan beharko dute. Iosu Arruabarrenaren errekurtsoa onartu zuen Gorenak. Atzo eguerdian jakinarazi zuen auzitegiak errekurtsoaren gaineko erabakia.
Auzipetuen abokatuak orain dela bederatzi hilabete jarri zion epaiari helegitea, eta duela bi aztertu zuen Auzitegi Gorenak. Edozein momentutan jakinaraztekoak ziren, eta atzo eman zuten horren berri: espetxeratzeko agindua dutenek sei urte eta sei urte eta erdi arteko zigorrak bete beharko dituzte.
Pasa den urtarrilean jakinarazi zuen Auzitegi Nazionalak Oarsoaldeko hamazazpi gazteen gaineko epaia, iazko uztailean epaiketa egin ondoren. Horietatik 11 absolbitu zituzten, eta seiri kartzela zigorrak ezarri zizkieten, epaiaren arabera betiere, “talde terroristako kide” izatea leporatuta. Lujanbiori sei urte eta erdiko zigorra ezarri zioten, eta gainontzekoei seinakoa. Fiskaltzak auzipetu guztientzako zortzina urteko espetxe zigorrak eskatu zituen, eta AVTk, berriz, zortzi eta hamabi urte arteko zigor eskaerak.
Auzipetuek orduan salatu zutenez, “torturetatik lortutako autoinkulpazioen frogekin” zein jazarpenekin epaitu zituzten.
2008an atxilotuak
2008ko apirilean eman zuen Fernando Grande Marlaska Espainiako Auzitegi Nazionaleko epaileak Oarsoaldeko 22 gazte atxilotzeko agindua, “Segiko kide izatea” leporatuta. Horietako hamar, apirileko polizia operazioan atxilotu zituzten eta beste hamar, Donostiako Auzitegian aurkeztu zirenean, urte horretako uztailean. Beste bik ihes egin zuten.
Apirilean atxilotu zituztenek tratu txarrak eta jazarpen sexuala salatu zituzten. Atxilotuen artetik, hamazazpi auzipetu zituzten, eta gainontzeko hirurak, epaiketaren aurretik absolbitu zituzten. Segiko kide izatea leporatu zieten guztiei. Epaia jakin eta berehala, lehen mobilizazioa egin zuten Errenteria-Oreretako Herriko Enparantzan. Hamarnaka lagunek hartu zuten parte bertan.
Igandean, manifestazioa
Auzitegi Gorenak epaia berresten zuela jakinaraztean, gutxi gorabehera une berean, Eleak-ek agerraldia egin zuen herrian. Igandean manifestazioa egingo dute Errenteria-Oreretan, 12:30etik aurrera, Gamon Zumarditik abiatuta. Leloa, azken hilabeteetan gazteak babesteko izan dena: Gure etxeko atea zabalik dute.
Agerraldia egitean, bertan zeudenek (zigortutako hiru zeuden prentsaurrekoan) ez zuten epaiaren berririk oraindik, eta Eleak-en izenean, Xanti Angulok esan zuen oraindik ez zekiela auzipetuei zer gertatuko zitzaien. Horregatik, zigortutako sei gazteak eta euren senideak “ezinegon hutsean” bizi direla salatu zuen, “egoera hau noiz bukatuko zain”. Espainiako justiziaren funtzionamendua “krudela” dela esan zuten Eleak-eko kideek.
Sei gazte horien alde babes harresia osatu nahi dute, eta horregatik igandean eskualdeko norbanako zein eragile guztiei dei egin diote bertaratzeko.
