Lan erreformaren baldintzak baino «dezente hobeak» lortu dituzte Catelsan
Akordioa lortu dute lantegiaren arduradunek eta enpresa batzordeko kideek Akordiorako oinarria abenduaren 5ean lotu zuten Catelsak eta enpresa batzordeak, eta hilaren 11n baiezkoa eman zioten langileen ordezkariek. Hala, langileei kontratua abenduaren 26an etengo diete —bitartean oporretan daude—, baina behintzat Espainiako Gobernuaren lan erreforman jasotako baldintzak baino «dezente hobeak» lortu dituzte azkenean, enpresa batzordeko kideen arabera. 56 urtetik gorako langileek aurrez erretiratzeko baldintzak lortu dituzte. Hortik beherako langile guztiek, lan egindako urte bakoitzeko 45 eguneko kalte-ordaina jasoko dute, gehienez 42 hilabete osatu arte. Azkenik, urtebeteko lana egin duten zazpi gaztek, 20 eguneko ordaina jaso beharrean, 90 egunekoa jasoko dute. Hilaren 26tik aurrera, gehienak lanik gabe geratuko dira. Eta bost-sei lagunek lanean jarraituko dute, enpresa guztiz itxi arte, pare bat hilabete inguru. Lortutakoa lortu arren, langileek salatzen jarraitzen dute enpresa bideragarria dela, eta azken unera arte lanean egon direla. Erabaki politikoa izan dela gogorarazi dute, eta enpresak onartu diela bertako makinak eta produkzioa Errumaniara eta Caceresera (Extremadura, Espainia) eramango dituztela. Akordioa epez kanpo lortu dute, enpresak denek sinatzea lortu nahi zuelako, lan erregulazio txostena atzera botatzeko aukerarik izan ez zedin. Izan ere, hasieran CCOO eta UGTk enpresaren lehen proposamena onartu zuten. LABek, ESK-k eta independiente batzuek, baina, uko egin zioten proposamen horri, [...]
Akordioa lortu dute lantegiaren arduradunek eta enpresa batzordeko kideek
Akordiorako oinarria abenduaren 5ean lotu zuten Catelsak eta enpresa batzordeak, eta hilaren 11n baiezkoa eman zioten langileen ordezkariek. Hala, langileei kontratua abenduaren 26an etengo diete —bitartean oporretan daude—, baina behintzat Espainiako Gobernuaren lan erreforman jasotako baldintzak baino «dezente hobeak» lortu dituzte azkenean, enpresa batzordeko kideen arabera.
56 urtetik gorako langileek aurrez erretiratzeko baldintzak lortu dituzte. Hortik beherako langile guztiek, lan egindako urte bakoitzeko 45 eguneko kalte-ordaina jasoko dute, gehienez 42 hilabete osatu arte. Azkenik, urtebeteko lana egin duten zazpi gaztek, 20 eguneko ordaina jaso beharrean, 90 egunekoa jasoko dute.
Hilaren 26tik aurrera, gehienak lanik gabe geratuko dira. Eta bost-sei lagunek lanean jarraituko dute, enpresa guztiz itxi arte, pare bat hilabete inguru.
Lortutakoa lortu arren, langileek salatzen jarraitzen dute enpresa bideragarria dela, eta azken unera arte lanean egon direla. Erabaki politikoa izan dela gogorarazi dute, eta enpresak onartu diela bertako makinak eta produkzioa Errumaniara eta Caceresera (Extremadura, Espainia) eramango dituztela.
Akordioa epez kanpo lortu dute, enpresak denek sinatzea lortu nahi zuelako, lan erregulazio txostena atzera botatzeko aukerarik izan ez zedin. Izan ere, hasieran CCOO eta UGTk enpresaren lehen proposamena onartu zuten. LABek, ESK-k eta independiente batzuek, baina, uko egin zioten proposamen horri, eta grebari ekin zioten. Azkenean, denek sinatu dute «borrokatutako proposamen hobea».
Catelsaren eskerrak
Catelsak jakinarazi du, bestalde, urtarrilean outplacement zerbitzua jarriko dutela martxan, beharginei aukera berriak topa ditzaten laguntzeko. Enpresak, langileek prozesuan izan duten jarrera eskertu du, baita urteetan egindako lan «bikaina» ere.
Irailaren 28an jakinarazi zien langileei Hutchinson taldeak, enpresaren jabeak, urtarrila baino lehen enpresa itxi eta 61 langileak kaleratzeko asmoa zuela. Taldeak argudiatu du itxierarako arrazoi nagusia «lehiakortasunaren etengabeko galera» izan dela.
Multinazionalak ehun lantegi baino gehiago ditu munduan, eta Errumanian, Polonian eta Europako ekialdean horietako batzuk handitu nahi ditu.
