Antxoko kantu jirak San Tomas azokan ospatuko du bosgarren urteurrena
Antxoko kantu jirak bosgarren urteurrena beteko du larunbat honetan. Eta hori ospatzeko, testuinguru aparta izango dute. Izan ere, antxotarrek antxotarrentzako propio antolatutako San Tomas azokan abestuko dute. Beraz, ohikoa baino jende gehiago egongo...
Antxoko kantu jirak bosgarren urteurrena beteko du larunbat honetan. Eta hori ospatzeko, testuinguru aparta izango dute. Izan ere, antxotarrek antxotarrentzako propio antolatutako San Tomas azokan abestuko dute. Beraz, ohikoa baino jende gehiago egongo da barrutiko kaleetan, are eta eguraldiak laguntzen badu.
Pasa den asteartean entsegua egin eta gero, prest daude bosgarren urteurrena ospatzeko. Zita 11:30ean jarri dute, Lore Txorta elkartearen arkupeetan, eta handik kalez kale abiatuko dira, giroa alaitzeko asmoz. San Tomas azoka izanik, baserritarrez jantzita joateko deia egin dute kantu jiraren antolatzaileek, “denak dotore joan gaitezen”. Antxotar guztiak deitu dituzte kaleak doinuz betetzera.
Bestalde, egun horretarako bazkaria antolatu du Antxoko Herrirak. Babarrun jatea (sakramentuak ez dira faltako) egingo dute, postrea eta kafearekin. 14:45ean hasiko da bazkaria, azokan bertan. Txartelek hamabost euro balio dute, eta ondoko tabernetan eros ahal izango dira: Mimosen, Kamion, Leundan, Izadin eta Kurlinkan. Herrirako kideek ere izango dituzte txartelak salgai.
Bazkaria antolatu duen taldeak azaldu duenez, bazkariaren ondoren musika egongo da, baita kantak zein karaokea ere.
Ekitaldi horiek Antxoko elkarteek antolatutako egitarauaren barruan sartzen dira.
