Irungo CAFeko langileek lanuzteekin bat egin dute
Irungo CAFeko langileek Beasaingo langileen protestekin bat egin dutela jakinarazi du Xabier Zufiria Oarso Bidasoko LABen metal arloko ordezkariak. Lan produkzioa gutxitu dela eta, sei hilabeteko lan erregulazio espedientea aplikatuko zuela jakinarazi zuen orain gutxi enpresaren zuzendaritzak, eta ondorioz, protestei ekitea erabaki zuten langileek. Batez ere Beasaingo lantegiari eragiten dion neurria dela adierazi du LAB sindikatuko kide Zufiriak, baina ados ez daudela eta, halako negoziaziorik ez dutela onartuko nabarmendu du. «Irabazi handiak dauzkan enpresa» dela adierazi du, eta espedientearen aurrean «beldur» direla: «Espediente hau onartzen bada, horren atzetik beste bat aplikatuko dela uste dugu». Lan erregulazio espedientea aplikatu aurretik beste aukera batzuk bazirela aipatu du Zufiriak —egutegi aldaketak eta bestelakoak— eta horren guztiaren aurrean Irungo CAFeko lantegian ere protestak mantenduko dituztela argi utzi du. 750 lagun dosierraren menpe Lehengo ostegunean aurkeztu zuen Beasaingo CAFeko zuzendaritzak aldi baterako lan erregulazio dosierra, eta Goierriko lantegiko 750 langileri eragingo die. Zuzendaritzak datozen sei hilabeteetarako lan karga murriztea espero du, eta arrazoi hori eman du espediente hori aurkezteko. Epe horretan lanaldia %20 murriztuko litzaieke langile horiei. Beasaingo lantegiko sindikatuen ordezkariek —LAB, ELA, CCOO eta ESK-koak— dosierra baztertu dute, eta orduz geroztik hamabost eguneko epea dute zuzendaritzarekin negoziatu eta bidezkoa balitz, adostasun batera iristeko. Irailera [...]
Irungo CAFeko langileek Beasaingo langileen protestekin bat egin dutela jakinarazi du Xabier Zufiria Oarso Bidasoko LABen metal arloko ordezkariak. Lan produkzioa gutxitu dela eta, sei hilabeteko lan erregulazio espedientea aplikatuko zuela jakinarazi zuen orain gutxi enpresaren zuzendaritzak, eta ondorioz, protestei ekitea erabaki zuten langileek.
Batez ere Beasaingo lantegiari eragiten dion neurria dela adierazi du LAB sindikatuko kide Zufiriak, baina ados ez daudela eta, halako negoziaziorik ez dutela onartuko nabarmendu du. «Irabazi handiak dauzkan enpresa» dela adierazi du, eta espedientearen aurrean «beldur» direla: «Espediente hau onartzen bada, horren atzetik beste bat aplikatuko dela uste dugu».
Lan erregulazio espedientea aplikatu aurretik beste aukera batzuk bazirela aipatu du Zufiriak —egutegi aldaketak eta bestelakoak— eta horren guztiaren aurrean Irungo CAFeko lantegian ere protestak mantenduko dituztela argi utzi du.
750 lagun dosierraren menpe
Lehengo ostegunean aurkeztu zuen Beasaingo CAFeko zuzendaritzak aldi baterako lan erregulazio dosierra, eta Goierriko lantegiko 750 langileri eragingo die. Zuzendaritzak datozen sei hilabeteetarako lan karga murriztea espero du, eta arrazoi hori eman du espediente hori aurkezteko. Epe horretan lanaldia %20 murriztuko litzaieke langile horiei.
Beasaingo lantegiko sindikatuen ordezkariek —LAB, ELA, CCOO eta ESK-koak— dosierra baztertu dute, eta orduz geroztik hamabost eguneko epea dute zuzendaritzarekin negoziatu eta bidezkoa balitz, adostasun batera iristeko.
Irailera arte 78,6 milioi euroko irabaziak izan ditu CAFek, eta hala jarraituz gero, iazko emaitzak hobetuko ditu. Hamar urte atzera eginez gero, nabaria da CAFek izandako goranzko bilakaera: 320,7 milioi euroko salmentak eta 8,6 milioiko irabaziak izan zituen 2002an.
