Atsedenaldia ondo etorri zaio Hondarribia-Iruni
Askoren ustez kirol partidetako atsedenaldiak, izenari men eginez, atseden hartzeko dira. Hondarribia-Irun saskibaloi taldeak bi zati nagusien tartea baliatu du lehen bi laurdenak ahazteko, eta hurrengo bietan kantxa jatera ateratzeko. Izan ere, gaur, ...
Askoren ustez kirol partidetako atsedenaldiak, izenari men eginez, atseden hartzeko dira. Hondarribia-Irun saskibaloi taldeak bi zati nagusien tartea baliatu du lehen bi laurdenak ahazteko, eta hurrengo bietan kantxa jatera ateratzeko. Izan ere, gaur, 71-77 irabazi dute Bidasoko neskek Lleidako Seu d’Urgell herriko Cadi taldearen kantxan, baina lehen zatiko emaitzari erreparatuta, mirari antzekoa izan da azken emaitza. Emakumeen Ligako zazpigarren jardunaldiko partida izan da.
Lehen laurdena 22-11 galdu dute berdeek. Etxeko taldeak bikoiztu egin du markagailuan Hondarribia-Irun. Lo irten dira zelaira bidasoarrak, eta ezin izan dute gelditu Kataluniakoen joko jarioa. Bigarren laurdenean 19na egin dute bi taldeek, hau da, lozorrotik esnatzen hasi dira kanpokoak, eta behintzat, ez etxeko taldeak ez du aldea handitu. Hirugarren laurdenean dena aldatu da, ordea: 14-23ko partziala eginez, markagailuan bi puntura hurbildu dira Caditik bidasoarrak, eta azken laurdenean hirugarrenaren urratsak jarraitu, eta 16-24 irabazi dute, 71-77ko azken emaitza osatu arte.
Hortaz, sasoiko laugarren partida irabazi dute gaur Lleidan berdeek —bigarrena jarraian—, eta Emakumeen Ligako hirugarren posturaino igo dira, beste taldeen jardunaldi honetako partiden zain.
