Tabakismoaren kontrako kanpaina abiaraziko dute badiaren inguruko herrietan
Azken urteetan erretzaileen kopurua jaitsi bada ere, tabakismoaren aurkako borrokan jarraitu nahi du Gipuzkoako Osasun Publikoko Zuzendariordetzak. Horretarako kanpaina bat jarri du abian, Gipuzkoako Osasun Eskualdearekin batera. Errenteria-Oreretako, Pasaiako, Lezoko, Altzako eta Bidebietako oinarrizko osasun eremuetan hedatuko dute, gehienbat, tabakismoaren kontrako mezua.
Kanpaina hori aurrera eramateko osasun eta gizarte eragileekin lan egingo dute, hala nola, farmaziekin, odontologoekin, Osalanekin edo eremu horietako eskoletako ikasleekin. Horretarako, herri horietako alkatetzekin zein Hezkuntza Sailarekin harremanetan jarri dira.
Gehienbat gazteekin egin nahi dute lan, eurengana iristeko zailtasun handiagoa dagoelako. “Ikasleak 11 urtetik 16ra bitartean hasten dira erretzen, medikura gehiegi joaten ez den populazio sektorea da, eta ez da erraza beraiengana betiko komunikabideak baliatuta iristea”, onartu du osasun zuzendaritzaordeak.
Horregatik, ikasleak eurak izango dira tabakismoaren kontrako kanpainaren identifikazio elementua egiteko ardura izango dutenak. Hala, hedatuko diren mezuen egile izango dira ikasleak, “informazio eta komunikazio teknologiak eskaintzen dituzten baliabideak erabilita”, azaldu duenez.
Lehiaketa
Ikasleek landuko dutena Hobe erre gabe lelopean egingo dute, eta elementu bisual bat osatuko dute. DBHko ikasleek har dezakete parte bertan. Lanak aurkezteko epea datorren urteko azaroaren 30era arte luzatu dute. Sarien artean PSP Vital, iTouch edo iPod mini bezalako gadgetak daude.
Ez da egingo duten lehiaketa bakarra izango. Izan ere, datorren ikasturteko lehen hiruhilekoan sakelako telefonoekin egindako bideoen lehiaketa egingo dute, lelo eta sari berberekin. Bideo horiek Youtuben jarriko dituzte gero.
Ohitura aldaketak
Euskal Autonomia Erkidegoan orain dela bost urte osasunaren gaineko inkesta egin zuten. Emaitzen arabera, Gipuzkoan gizonen %29k erretzen du, eta emakumeen %21ek.
Gazteen artean, hala ere, sexuen ikuspuntutik, ohitura aldatzen ari da. Horrela, 16 eta 24 urte bitarteko nesken %27,5 da erretzailea, eta mutilen %23. Erretzeko ohitura uztaraztea da kanpainaren muinetako bat.
