«Polita izan da elkartzea»
Euskararen Egunaren karietara hainbat elkartek indarrak batu dituzte, eta egitarau zabal bat osatu dute. Abenduaren lehen asteburuan dira ekitaldi gehienak, baina dagoeneko hasi dira. AEKko irakasle Enara Zubeldia eta Betti Gotti Euskara Taldeko Miren Polo antolatutakoaz eta euskararen egoeraz mintzatu dira. Abenduaren 3an Euskararen Nazioarteko Eguna izango da. Zergatik? Enara Zubeldia: Euskarak egun bat eduki behar izatea, seinale txarra da, euskararen egoera behar bezalakoa ez delako existitzen da egun hori. Baina aitzakiarekin ekintzak antola daitezke, eta kontzientziak eragin. Miren Polo: Denetatik: salatzeko eguna bada, baina baita gozatzekoa ere. Kasu honetan, irundar guztiek antolatu dugun egitarauaz gozatu ahal izatea ona da. Elkarte ugari batu zarete lehen aldiz Euskararen Eguna Irunen ospatzeko. Nolakoa izan da elkartze hori? Polo: Ez da zaila izan. Finean, Irunen badira euskara bultzatzen duten elkarteak eta horrelako proposamena zure eguneroko jarduerarekin bat datorrenean, gustura hartzen duzu. Horregatik hemendik aurrera elkarte gehiago izatea espero dugu, indarra hartzeko. Lehen urtea da eta gauza dezente antolatu ditugu, baina indarra hartzea espero dugu datozen ekitaldietan gehiago izateko. Zubeldia: Nahiko naturala izan da. Askok buruan genuen kezka baten harira sortutako elkarrizketa baten ondorioa izan da. Nork bere buruan bazuen hemen indarra egin behar dela, euskaradun asko gaudela, baina ez dela sumatzen. Indar metaketa [...]
Miren Polo eta Enara Zubeldia
Euskararen Egunaren karietara hainbat elkartek indarrak batu dituzte, eta egitarau zabal bat osatu dute. Abenduaren lehen asteburuan dira ekitaldi gehienak, baina dagoeneko hasi dira. AEKko irakasle Enara Zubeldia eta Betti Gotti Euskara Taldeko Miren Polo antolatutakoaz eta euskararen egoeraz mintzatu dira.
Abenduaren 3an Euskararen Nazioarteko Eguna izango da. Zergatik?
Enara Zubeldia: Euskarak egun bat eduki behar izatea, seinale txarra da, euskararen egoera behar bezalakoa ez delako existitzen da egun hori. Baina aitzakiarekin ekintzak antola daitezke, eta kontzientziak eragin.
Miren Polo: Denetatik: salatzeko eguna bada, baina baita gozatzekoa ere. Kasu honetan, irundar guztiek antolatu dugun egitarauaz gozatu ahal izatea ona da.
Elkarte ugari batu zarete lehen aldiz Euskararen Eguna Irunen ospatzeko. Nolakoa izan da elkartze hori?
Polo: Ez da zaila izan. Finean, Irunen badira euskara bultzatzen duten elkarteak eta horrelako proposamena zure eguneroko jarduerarekin bat datorrenean, gustura hartzen duzu. Horregatik hemendik aurrera elkarte gehiago izatea espero dugu, indarra hartzeko. Lehen urtea da eta gauza dezente antolatu ditugu, baina indarra hartzea espero dugu datozen ekitaldietan gehiago izateko.
Zubeldia: Nahiko naturala izan da. Askok buruan genuen kezka baten harira sortutako elkarrizketa baten ondorioa izan da. Nork bere buruan bazuen hemen indarra egin behar dela, euskaradun asko gaudela, baina ez dela sumatzen. Indar metaketa ona izan da; ea balio duen pixkanaka Irunen sumatzeko bagarela.
Polo: Bai, bakoitzak bere bidea egiten du. Beti Gottik berea, AEK-k berea… Polita izan da zenbait elkarte elkartzea, eta Euskararen Egunerako, batik bat.
Euskararen erabilera sustatzeko Kalean Bai egitasmoa orain dela hamar urte abiatu zen. Eraginik izan al du Irungo kaleetan?
Polo: Guk alde sinatu genuen, beste hainbat elkartek bezala. Egia da badirela elkarte asko sinatu dutenak, baina gero ez zaigu gehiago eskatu. Gu euskara taldea gara eta euskaraz egiten dugu dena, baina beste batzuek zer egiten duten… Sumatu? Ez dakit sumatu den. Kalean Bai egitasmoa sinatzeak ez du aldatu elkarteen funtzionamendua.
Zubeldia: Finean euskararekiko konpromisoa hartzeko sinadura bat da, eta nik uste argazkian geratu dela. Ez dut ezagutzen elkarte bakoitzaren errealitatea, baina ez zait iruditzen kalean eraginik izan duenik. Argazkirako balio izan du, funtzionamendurako baino. Jarraipena eman beharko litzaioke eta horretarako baliabideak jarri behar dira. Horretarako, berriz, gogoa behar da.
Polo: Polita litzateke, adibidez, Kalean Bai egitasmoa sinatu duten elkarte askok Euskararen Eguneko antolakuntzan egotea, nahiz eta erabat euskaldunak ez izan.
Zubeldia: Bai, baina betiere euskararen aldeko kontzientziak eta koherentziak bat eginez gero. Edonori galdetuta euskararen alde dagoen, ‘jakina baietz’ esango du, nola egongo dira hizkuntza baten kontra? Baina hori pasatu dugu jada. ‘Orain zer egingo duzu zuk gure herrian euskara normalizatzeko?’. Hori da galdera.
Askoz handiagoa da euskararen ezagutza erabilpena baino, eta hortan ere euskal hiztunek badute ardura.
Zubeldia: Hori da kontua. Ados gaude euskara altxorra dela. Denek egin behar dugu aurrera eta iritsi da ordua ondokoari kontuak eskatzeko. Euskararen Egunak ez du askorako emango, baina baliatu behar dugu ondokoa pixka bat zirikatzeko, galdetzeko euskararen alde zer egiteko prest dagoen. Beste pauso bat edo akabo, museorako geratuko da hizkuntza.
Antolatzaileetako bat Irungo Udala da. Nolako harremana duzue euskara elkarteek eta udalak?
Zubeldia: Udalak gauza asko egingo ditu ondo, baina egia da ere euskararekiko hutsune handia duela. Batetik, aurrekontuak ez duelako ematen, eta bestetik, aurrekontua banatzeko moduagatik. Adibidez, euskara ikasteko beka mahai gainean dago. Bere garaian Herri Jakintza eta AEK euskaltegiei diru laguntza kendu zigun, diru horrekin beka ematen hasteko, eta orain beka bera zalantzan dago. Hori da gure kontraesana, AEKrena esaterako, gu egiten ari garena udalak egin beharko luke, beraiek agerian utzitako hutsune bat estaltzen ari gara, eta hala ere, beraiekin batera antolatzen ari gara Euskararen Eguna. Udalari koherentzia eskatzen diot.
Polo: Egia da elkarte batzuk ari garela hutsune hori betetzen, eta udalak lagundu nahi duela antolatzen. Baina gero oztopoak besterik ez ditu jartzen: baliabide ekonomikoak direla, azpiegiturak… Helburu berbera baldin badugu, euskararen normalizazioa, zertara datoz hainbeste oztopo? Ez bakarrik Euskararen Egunerako, baizik eta beste ekitaldi guztietarako.
Zubeldia: Udalak Euskararen Eguna antolatzeak ez dauka batere meriturik, hori baita bere eginbeharra, herritarron esku bere baliabideak jartzea, alegia.
