Jose Caballero (SAT): “Ekintza zuzenak eman digu mobilizazioetan izandako arrakasta”
Mikelazulon Lola Alvarez SATeko kidearekin atzo ematekoa zen hitzaldirako bidean, Sevillako aireportuan harrapatu du HITZA-k Jose Cabello (Fuente de Andalucia, Sevilla, Espainia, 1960). Batik bat Mercadonako ekintzaren ostean egin da ezagun sindikatua, baina hori baino gehiago da. Ekintza zuzeneko sindikatua dela azaldu du. Zertaz hitz egingo duzue gaurko [atzoko] hitzaldian? Hitzaldietara bi SATeko kide joaten gara. Ni SATeko Antolakuntza Idazkaria naiz, eta sindikatuaren historiari buruz, eta aurrera eramaten ditugun mobilizazioei buruz hitz egiten dut. Hitzaldi horren laguntzen dit Lola Alvarez lankideak. Bera azkena okupatu dugun Somonte lursaileko arduraduna da. Botako dugun mezua izango da sindikatua zertan ari den Andaluzian, eta nola doan Somonteko okupazioa. Bederatzi hilabete daramatza okupatuta, eta dagoeneko fruituak ematen hasi da. Astebete pasatu da azken greba orokorretik, bigarrena zortzi hilabeteetan. SATek ere bat egin zuen grebarekin. Zein irakurketa egiten duzue? Greba Andaluzian arrakastatsua izan da, saltoki eta lantegien %80k itxi zuen. Herrietan jarraitu zuten batik bat, eta hiriburuetan ireki zituzten denda batzuk. Herrietan, ordea, ia denek egin zuten bat. Hala ere, guk iritzi diogu egun bateko grebak ez diola dagoeneko sistemari gehiegi eragiten, eta grebaz gain, beste borroka mota bat egin behar dela. Edo gehiago iraungo duen greba bat edo beste borroka mota bat (gu egiten ari [...]
Caballero (eskuinean) Lola Alvarez SATeko kidearekin
Mikelazulon Lola Alvarez SATeko kidearekin atzo ematekoa zen hitzaldirako bidean, Sevillako aireportuan harrapatu du HITZA-k Jose Cabello (Fuente de Andalucia, Sevilla, Espainia, 1960). Batik bat Mercadonako ekintzaren ostean egin da ezagun sindikatua, baina hori baino gehiago da. Ekintza zuzeneko sindikatua dela azaldu du.
Zertaz hitz egingo duzue gaurko [atzoko] hitzaldian?
Hitzaldietara bi SATeko kide joaten gara. Ni SATeko Antolakuntza Idazkaria naiz, eta sindikatuaren historiari buruz, eta aurrera eramaten ditugun mobilizazioei buruz hitz egiten dut. Hitzaldi horren laguntzen dit Lola Alvarez lankideak. Bera azkena okupatu dugun Somonte lursaileko arduraduna da. Botako dugun mezua izango da sindikatua zertan ari den Andaluzian, eta nola doan Somonteko okupazioa. Bederatzi hilabete daramatza okupatuta, eta dagoeneko fruituak ematen hasi da.
Astebete pasatu da azken greba orokorretik, bigarrena zortzi hilabeteetan. SATek ere bat egin zuen grebarekin. Zein irakurketa egiten duzue?
Greba Andaluzian arrakastatsua izan da, saltoki eta lantegien %80k itxi zuen. Herrietan jarraitu zuten batik bat, eta hiriburuetan ireki zituzten denda batzuk. Herrietan, ordea, ia denek egin zuten bat. Hala ere, guk iritzi diogu egun bateko grebak ez diola dagoeneko sistemari gehiegi eragiten, eta grebaz gain, beste borroka mota bat egin behar dela. Edo gehiago iraungo duen greba bat edo beste borroka mota bat (gu egiten ari garena). Alegia, krisiaren errudunei zuzenean behatzarekin seinalatu. Esate baterako, barkuen okupazioarekin, lursailenen, baita merkatuetan egin dugun espropiazioaren bitartez ere.
Egun bateko greba mugatua dela iritzi diozu. Zergatik ez da bultzatzen greba mugagabea?
Batez ere CCOO eta UGT ez dituztelako mota horretako grebak deitu nahi. Asko kostatzen zaie greba bat egitea. Gainontzeko sindikatuak, berriz, behintzat, Andaluzian, eurek deialdia egin eta gero batzen gara, guk bakarrik deituz gero arazo gehiago izango baikenuke greba aurrera ateratzeko. Gauza izango litzateke sindikatu guztiak ados jartzea, data bat jarri, eta gutxienez, hiru eguneko greba izatea. Modu horretara, gobernuari benetako kolpe bat emango genioke. Gobernuak oso belarri txarra dauka, eta ez ditu entzuten langileek eta langabeek dituzten arazoak.
CCOO eta UGTri greba deialdiak egitea kostatzen zaiela aipatu duzu. Zergatik?
Sindikatu horiek gobernuaren diru laguntzetatik bizi dira ia erabat, eta horrek askatasuna mugatzen die grebak deitzerako garaian. Ez da gauza bera gertatzen gu bezalako sindikatu alternatibo eta txikiekin. Klase sindikatuak gara, eta mobilizazioak modu jarraikorragoan eramaten ditugu aurrera. Hori da dagoen ezberdintasun nagusia, eta horregatik gobernuek dute erosita CCOO eta UGTko kupula. Kupulari buruz ari naiz, ez oinarriko militanteez. Kupula erosita daukanez ez dituzte mobilizazioak modu jarraikorrean egiten. Hala egin beharko lirateke, nahikoa arrazoi badagoelako mobilizazioa etengabea izateko.
Haatik, SAT eta beste sindikatu alternatiboen ekintzek geroz eta babes handiagoa dutela dirudi.
Egia da denbora asko daramagula mota horretako mobilizazioak egiten. Hala ere, badirudi orain gehiago konektatu dugula herritarrekin. Izan daiteke orain behar gehiago dagoelako eta era berean, behar horrek bultzatuta jendeak erreferente bezala gaituela. Hainbat martxa egin izan ditugu Andaluziako probintzia guztietatik, eta nahikoa onespen eduki dugu. Hilaren 27, 28 eta 29rako emakumeen martxa bat antolatu dugu, emakumeek zailtasun gehiago dutelako lanpostua lortzeko, eta batik bat landa eremuan. Espero dugu udaran egin izan dugun martxan besteko arrakasta izatea.
Lan ildo horiek ikusita, sindikalismoa bulegotik kalera atera duzuela esan daiteke?
Guk gure burua daukagu lanean bertan, langileekin, dagoen sindikatutzat; alegia, ekintza zuzena egiten duen sindikatu bat bezala. Asanblea nazionalean elkartzen gara, hainbat mobilizazio onartzen ditugu. Batzuk ‘ekintza sorpresa’ izaten dira. Ekintza egin behar denean, bozeramaileen bidez mezua zabaltzen da, eta hiruzpalau ordutan mila lagun inguru mugitzeko aukera dugu. Hori da beste sindikatuekin daukagun aldeetako bat, gure afiliatuek barneratuta daukatela sindikatuaren filosofia. Ekintza zuzeneko sindikatua gara. Horrek eman digu mobilizazioetan izandako arrakasta.
Zenbat afiliatu ditu SATek?
Momentu honetan Andaluzian 15.000 afiliatu inguru ditugu, baina azken aldian hazten ari gara, udan izandako mobilizazioen ondoren. Sindikatu txikia gara.
Ekintza zuzen horrek, ordea, eztabaida ugari sortu du.
Egia da. Izango da jendea ulertzen ez duena. Mercadonako ekintza, esaterako, ika-mika gehien sor dezakeena, egin dugu behatzarekin seinalatzeko krisiaren errudunak nortzuk diren, eta era berean, erakusteko zeintzuk diren benetan krisia pariatzen ari direnak. Andaluzian 400.000 familia daude langabezian, eta horietatik 350.000 familia daude ezer ere ez daukatenak, inongo laguntzarik ez daukatenak. Jende horrek jan beharra dauka normala den bezala. Horregatik egin duguna izan da salatu. Argi dago Mercadonatik atera genuen 14-15 erosketa orgarekin ez diogu mundu guztiari jaten emango, baizik eta gobernua lotsarazi nahi dugu, eta baita hemen Andaluzian hainbat familiek jasaten duten egoera salatu ere. Landa eremuan langabezia %40ekoa.
Ekintza horiek gogor murriztuak izan dira. Zu zeu ere atxilotua izan zinen Mercadonakoa eta gero.
Hala da. 20 ordu eduki ninduten ziega batean sartuta, ni beste sei lankiderekin batera. Guk badakigu zertara arriskatzen garen. Badakigu gure ekintza legez kanpo egotetik gertu egon daitekeela, baina beti egiten dugu modu baketsuan, eta ez gara inoiz sartzen indarkerian. Kontua da salatzea milaka familiek bizi duten egoera. Norbaitek salatu behar du hori. Hori dela eta, kritikatu izan digute, baina egia da horregatik beragatik babes gehiago izan dugula kalean. Eztabaida sortu dugula argi dago, eta horren harira, ados eta kontra daudenak egongo dira. Hedabide askotatik ere deitu digute, baita Europatik kanpo ere.
SATek berak eta beste motatako ekintza sozialek poliziaren jarrera salatu izan dute. Sistemaren kontra egiten ari den mugimendu hori zapaltzen ari direla uste duzu?
Poliziaren eta gobernuaren jarrera geroz eta gogorragoa da, eta aztertzen ari dira lege gogorragoak jendea kalera manifestatzera ateratzea debekatzeko. Legeak atera nahi dituzte manifestari bati jotzen ari den polizia bati ezin grabatu izateko. Gehiegi da hau. Lortu ditugun eskubideetan atzerapauso izugarria da, urteetan atzera egitea. Egoera horretan ere borrokan segitu behar dugu. Krisia hasi zenetik, murrizketak egiten hasi ziren, eta langileek ezin izan dugu eskubide sozialen lorpenen atzerapauso hori gelditu ahal izan. Lehendabizi hori gelditu nahi dugu, eta hori lortutakoan, galdutako eskubideak berreskuratzen saiatuko gara.
Hain zuzen, krisia oso gogor jotzen ari da, eta orain arte proposatu diren neurri bakarrak murrizketak izan dira. SATetik zein neurri planteatzen dituzue?
Benetan krisia sortu dutenek ordaintzea nahi dugu, bankuen dirua zerga paradisuetara eraman dutenek, horiek ordaintzea. Langile batek gerrikoa orain baino gehiago estutzea ezinezkoa du. Eurek, ordea, ez daukate inongo eskrupulurik, eta estutzen jarraituko dute. Andaluzian asko kritikatzen ari den zerbait da nekazaritza laguntza da, langabezian dauden horiek jasotzen dutena. Langabezian egon behar dute jasotzeko, eta hainbat baldintza ere bete behar dituzte, ez du edozeinek jasotzen. Haatik, inor ez ditu kritikatzen lur jabe handiek jasotzen dituzten laguntzak, lurrak edukitzeagatik bakarrik. Alegia, lurrak ez ereitegatik milaka euro jasotzen dituzte lur jabeek. Banaketa bidezkoagoa egin behar da, eta gehien duenak ordaintzea, batik bat.
Hori lortzeko oso garrantzitsua da langileen arteko batasuna. Zentzu horretan egin duzue zuek Langileen Martxa. Nola joan da?
Oso ondo joan da. Espero baino jende bikoitzak gehiago parte hartu du. Hiriburuek gainezka egin dute. Arrazoia dena dela, jendearekin konektatzea lortu dugu, eta jendea atera da martxa honetan. Positiboena izan da, bandera asko batzeko gai izan garela. Gure martxan SATeko kideez gain, beste sindikatu, alderdi, talde sozial… denek bat egin dute.
Euskal Herriko sindikatuek, ELA eta LAB kasu, bat egin dute martxa horrekin. Posible da halakorik egitea Euskal Herrian? Beharrezkoa da?
Euskal Herrian Andaluzian baino langabezia gutxiago dago, Andaluzian, beraz, arrazoi gehiago daude egiteko Euskal Herrian baino. Baina toki guztietara zabal daiteke murrizketekin eta zergen igoerekin kaltetzen ari direlako, eta batik bat laguntzarik gabe geratzen ari diren horien egoera salatzeko. Egia da Euskal Herriko sindikaturen batetik ere deitu digutela gora igo eta martxen gaia azaltzeko, ez dakit eurek asmoa dutelako martxaren bat egiteko, edo gurekin esperientzia partekatu nahi dutelako. Guk asko eskertzen diegu, eta oso harreman ona daukagu beraiekin.
