Hilaren 23an hasiko dira Xenpelar Sarien kanporaketak
Bertsolari gazteak hartzeko prest dago Errenteria-Orereta. Datorren ostiralean, hilak 23, hasiko dira XXI. Xenpelar Sarien kanporaketak, eta horietan hemezortzi gazte ariko dira nor baino nor lehian. Hiru kanporaketa jokatuko dituzte, eta sei bertsolari sailkatuko dira finalerako, kanporaketa bakoitzetik bi. Finala abenduaren 8an izango da Errenteria Hiria Kulturgunean, 18:00etan. Azken urteetan bezala, aurten ere Ereintza elkarteak eta Xenpelar Bertso Eskolak antolatu dute txapelketa, eta atzo Naroa Perez eta Julian Albisturrek eman zituzten horren gaineko xehetasun guztiak. Hemezortzi bertsolarik parte hartuko dute 21. aldian. Albisturrek azaldu zuenez, horiek aukeratzerako garaian, parekidetasuna eta lurraldetasuna kontuan hartu dituzte. Hain zuzen, hemezortzitik sei izango dira emakumeak, eta jatorriari dagokionez, bederatzi gipuzkoarrak, hiru bizkaitarrak, eta Araba, Lapurdi eta Nafarroako bina. Horien artean, ordezkari bat izango du bertso eskolak: Haritz Casabal pasaitarra. Xenpelar Bertso Eskolako irakaslea da, eta eskolari txapel bat eman dion bakarra: aurten irabazitako Lizardi Saria. Jada gazteen artean erreferente bihurtu den txapelketa horretan “Euskal Herri osoko bertsolaritza esparru osoa hartu” nahi izan dutela jakinarazi zuen Albisturrek. Sariketa bi urtero egiten dute, eta ohi denez, aurreko urteetan txapeldun izan den bertsolari bat omenduko dute, eta aurten Xabier Perez Euzkitze-ri egokitu zaio. “Bertsotan gutxitan aritzen da, eta kulturgunera joaten direnek aukera izango dute entzuteko”, zehaztu zuen [...]
Bertsolari gazteak hartzeko prest dago Errenteria-Orereta. Datorren ostiralean, hilak 23, hasiko dira XXI. Xenpelar Sarien kanporaketak, eta horietan hemezortzi gazte ariko dira nor baino nor lehian. Hiru kanporaketa jokatuko dituzte, eta sei bertsolari sailkatuko dira finalerako, kanporaketa bakoitzetik bi. Finala abenduaren 8an izango da Errenteria Hiria Kulturgunean, 18:00etan.
Azken urteetan bezala, aurten ere Ereintza elkarteak eta Xenpelar Bertso Eskolak antolatu dute txapelketa, eta atzo Naroa Perez eta Julian Albisturrek eman zituzten horren gaineko xehetasun guztiak.
Hemezortzi bertsolarik parte hartuko dute 21. aldian. Albisturrek azaldu zuenez, horiek aukeratzerako garaian, parekidetasuna eta lurraldetasuna kontuan hartu dituzte. Hain zuzen, hemezortzitik sei izango dira emakumeak, eta jatorriari dagokionez, bederatzi gipuzkoarrak, hiru bizkaitarrak, eta Araba, Lapurdi eta Nafarroako bina.
Horien artean, ordezkari bat izango du bertso eskolak: Haritz Casabal pasaitarra. Xenpelar Bertso Eskolako irakaslea da, eta eskolari txapel bat eman dion bakarra: aurten irabazitako Lizardi Saria.
Jada gazteen artean erreferente bihurtu den txapelketa horretan “Euskal Herri osoko bertsolaritza esparru osoa hartu” nahi izan dutela jakinarazi zuen Albisturrek.
Sariketa bi urtero egiten dute, eta ohi denez, aurreko urteetan txapeldun izan den bertsolari bat omenduko dute, eta aurten Xabier Perez Euzkitze-ri egokitu zaio. “Bertsotan gutxitan aritzen da, eta kulturgunera joaten direnek aukera izango dute entzuteko”, zehaztu zuen Albisturrek.
Kanporaketak doan dira, eta finaleko txartelek 3 euro balio dute.
Kanporaketak
- Lehenengoa (hilak 23). Haritz Casabal, Aitor Urbieta, Amaia Iturriotz, Ane Labaka, Maddi Ane Txoperena eta Gorka Maiz.
- Bigarrena (hilak 30). Arrate Illarro, Maddi Sarasua, Peio Ormazabal, Iker Agirre, Iñaki Aleman eta Asier Azpiroz.
- Hirugarrena (abenduak 1). Unai Gaztelumendi, Jone Uria, Manu Goiogana, Oier Aizpurura, Ander Solozabal eta Aimar Karrika.
- Kanporaketa guztiak Xenpelar Etxean izango dira, 19:30etik aurrera.
