Barakaldoko gertakariaren ondoren desjabetzeak eten ditu Kutxabankek
Ostiral goizean Barakaldon etxetik kaleratu behar zuten emakume batek bere buruaz beste egin zuenetik, asko izan dira muturreko egoeran dauden pertsonen kaleratzeen aurka agertu direnak, eta erreakzioak azkar iritsi dira. Hain zuzen ere, ostiral goizean elkarretaratzea egin zuten Kutxabankek Irungo Colon pasealekuan duen sukurtsal parean. Bertan, Juan Carlos Infante gaztearen egoera salatu zuten. Bidasoko Kaleratzeei Stop elkartearen arabera, “Kutxabankek ez du inongo negoziaketarik onartu” gazte irundarraren egoera aztertzeko. Lanik gabe geratu zenean Infantek hipoteka ordaintzeari utzi zion eta Kutxabankek desjabetze prozedura abiatu zuen. Ondoren, gazteak beste lan bat lortu eta ordaintzen jarraitzeko asmoa adierazi zuen arren, bere etxea enkantean jarri zuen AIKSA Kutxabanken higiezinen agentziak. Infantek etxean bizitzen jarraitu izan du, baina etzi baino lehenago bertatik ateratzeko exijitu dio Kutxabankek, baldin eta prozedura penal bat hastea nahi ez badu. Ostiraleko elkarretaratzean Kutxabankeko arduradunek “negoziatzeko inolako asmorik” erakutsi ez dutelako kexu zen Infante, “nahiz eta hipoteka ordaintzen jarraitzeko prest nagoen”. Hamarnaka herritarrek lagundu zioten protestaldian eta, bertan zeudela, Barakaldoko emakumearen albistea jakin zuten. Barakaldoko gertakariaren ondoren, Donostiako alkateak eta Gipuzkoako ahaldun nagusiak Kutxabank erakundeari desjabetzeak bertan behera uzteko exijitu zioten —Donostiako Udala eta aldundia erakunde finantzieroko administrazio batzordean daude ordezkatuta—. Atzo, Kutxabankeko presidente Mario Fernandezek hipoteken exekuzioak bertan behera uzteko agindu zuen eta lehen [...]
Juan Carlos Infanteren egoera salatu zuten ostiraleko elkarretaratzean
Ostiral goizean Barakaldon etxetik kaleratu behar zuten emakume batek bere buruaz beste egin zuenetik, asko izan dira muturreko egoeran dauden pertsonen kaleratzeen aurka agertu direnak, eta erreakzioak azkar iritsi dira. Hain zuzen ere, ostiral goizean elkarretaratzea egin zuten Kutxabankek Irungo Colon pasealekuan duen sukurtsal parean.
Bertan, Juan Carlos Infante gaztearen egoera salatu zuten. Bidasoko Kaleratzeei Stop elkartearen arabera, “Kutxabankek ez du inongo negoziaketarik onartu” gazte irundarraren egoera aztertzeko.
Lanik gabe geratu zenean Infantek hipoteka ordaintzeari utzi zion eta Kutxabankek desjabetze prozedura abiatu zuen. Ondoren, gazteak beste lan bat lortu eta ordaintzen jarraitzeko asmoa adierazi zuen arren, bere etxea enkantean jarri zuen AIKSA Kutxabanken higiezinen agentziak. Infantek etxean bizitzen jarraitu izan du, baina etzi baino lehenago bertatik ateratzeko exijitu dio Kutxabankek, baldin eta prozedura penal bat hastea nahi ez badu.
Ostiraleko elkarretaratzean Kutxabankeko arduradunek “negoziatzeko inolako asmorik” erakutsi ez dutelako kexu zen Infante, “nahiz eta hipoteka ordaintzen jarraitzeko prest nagoen”. Hamarnaka herritarrek lagundu zioten protestaldian eta, bertan zeudela, Barakaldoko emakumearen albistea jakin zuten.
Barakaldoko gertakariaren ondoren, Donostiako alkateak eta Gipuzkoako ahaldun nagusiak Kutxabank erakundeari desjabetzeak bertan behera uzteko exijitu zioten —Donostiako Udala eta aldundia erakunde finantzieroko administrazio batzordean daude ordezkatuta—. Atzo, Kutxabankeko presidente Mario Fernandezek hipoteken exekuzioak bertan behera uzteko agindu zuen eta lehen etxebizitzen gaineko hipoteketan izango du eragina. Irungo alkate Jose Antonio Santanok poza agertu du Kutxabanken erabakia ezagutu eta gero eta “araudia aldatze urjentziazkoa” dela gaineratu du.
Euskadiko Kutxak, bere aldetik, krisia hasi zenetik “etxe kaleratze traumatikorik” ez duela burutu jakinarazi du ohar bidez.
Legea aztergai Madrilen
Barakaldoko gertakariaren ondotik erreakzioak ugari izan dira. Une honetan Madrilen bilera egiten ari dira PP eta PSOEko ordezkaritza bana, hipoteken legea aldatzeko proposamenak eta behin behineko neurriak aztertzeko. Bileraren aurretik sozialistek esan dute gobernuari kaleratzeen moratoria bat eskatuko zutela.
Espainiako Hipotekek eragindakoen elkartearentzat (PAH), moratoria hori ez da nahikoa: “Moratoria onartezina da, ez liekeelako eragingo jada martxan dauden etxe kaleratzeei eta jende oso gutxiri erangingo diolako. PAH elkarteak babestu du moratoriak familia guztiei eragitea, beti ere hipoteka ordaintzeko zailtasunak eratorriak izan direnean, eta etxebizitza familia horren ohiko etxebizitza bada. Gainera zorra kitatzeko etxea ordainetan eman ahal izatea eskatu du, eta bankuak pilatzen ari diren etxebizitzak alokairu sozialerako bideratzea”.
Bestalde, Espainiako Banku Elkarteak datozen bi urteetarako kaleratzeak bertan behera utziko dituela jakinarazi du, “muturreko beharra” dagoen kasuetan. Bankia, ING, BBVA eta Santander dira elkarteko kide, besteak beste. “Arrazoi humanitarioengatik” hartu dute konpromiso hori, elkarteak ohar bidez zehaztu duenez.
