Udala: “Ordenantzek udala zein herritarren egoera zailari erantzuten diote”
Duela astebete onartu zituen udalbatzak 2013ko ordenantza fiskalak. Udal gobernu taldearen arabera, udalaren egoera ekonomiko txarra kontuan hartuta, “ahalegin” bat egin dute herritarrei krisiaren pisuarekin ez kargatzeko. Zentzu horretan, ordenantza fiskal horietan “udalaren zein herritarren egoera zaila kontuan” hartu duela nabarmendu du udal gobernu taldeak. Ostiralean egin zuten ordenantza fiskalen gaineko irakurketa Julen Mendoza alkateak, Jon Txasko Ogasun zinegotziak eta Jose Manuel Ferradasek Ezker Anitzako ordezkari bezala. Mendozak, hain zuzen, “udalaren ahalegina” nabarmendu zuen, herritarrei gehien eragiten dieten zerga eta tasetan, hala nola, higiezinen gaineko zergan, uraren tasan edo garraio publikoan. Hiruen gaineko zerga eta tasak izoztu egin dituzte. Udalaren egoeraren berri ere eman zuen Mendozak, eta 41 milioi euroko gastu arrunteko aurrekontua izango duela azaldu du, eta hortik 6,5 milioi euro bideratu behar dituztela foru funtsarekin eta bankuekin duen zorra kitatzera. Gobernu taldeak ere beste alderdi politikoekin eduki duen «ulermena» garrantzitsutzat jo du, batik bat PSE-EErekin. Gobernu taldeak eta talde sozialistak uraren tasa izoztean eta langabeentzako hobarietan egin dute bat. “Proposamen aproposak iruditu zitzaizkigun, eta ordenantzetan sartzeko modua aurkitu genuen, gure pentsamenduarekin bat datorrelako ere”, azaldu zuen Mendozak. Alkateak “posizionamenduak hurbiltzeko gai” izan direla nabarmendu zuen, batik bat aurreko udal gobernua PSE-EErena izan zela kontuan izanda, eta egungo oposizioko [...]
Duela astebete onartu zituen udalbatzak 2013ko ordenantza fiskalak. Udal gobernu taldearen arabera, udalaren egoera ekonomiko txarra kontuan hartuta, “ahalegin” bat egin dute herritarrei krisiaren pisuarekin ez kargatzeko. Zentzu horretan, ordenantza fiskal horietan “udalaren zein herritarren egoera zaila kontuan” hartu duela nabarmendu du udal gobernu taldeak.
Ostiralean egin zuten ordenantza fiskalen gaineko irakurketa Julen Mendoza alkateak, Jon Txasko Ogasun zinegotziak eta Jose Manuel Ferradasek Ezker Anitzako ordezkari bezala.
Mendozak, hain zuzen, “udalaren ahalegina” nabarmendu zuen, herritarrei gehien eragiten dieten zerga eta tasetan, hala nola, higiezinen gaineko zergan, uraren tasan edo garraio publikoan. Hiruen gaineko zerga eta tasak izoztu egin dituzte.
Udalaren egoeraren berri ere eman zuen Mendozak, eta 41 milioi euroko gastu arrunteko aurrekontua izango duela azaldu du, eta hortik 6,5 milioi euro bideratu behar dituztela foru funtsarekin eta bankuekin duen zorra kitatzera.
Gobernu taldeak ere beste alderdi politikoekin eduki duen «ulermena» garrantzitsutzat jo du, batik bat PSE-EErekin. Gobernu taldeak eta talde sozialistak uraren tasa izoztean eta langabeentzako hobarietan egin dute bat. “Proposamen aproposak iruditu zitzaizkigun, eta ordenantzetan sartzeko modua aurkitu genuen, gure pentsamenduarekin bat datorrelako ere”, azaldu zuen Mendozak.
Alkateak “posizionamenduak hurbiltzeko gai” izan direla nabarmendu zuen, batik bat aurreko udal gobernua PSE-EErena izan zela kontuan izanda, eta egungo oposizioko alderdi nagusiena. Hurbiltze hori ordenantza fiskaletan lortzea, “urrats kualitatiboa” dela esan zuen. Horrez gain, beste garai batzuetan ulermen hori “ezinezkoa” izango zela uste du.
Bost neurri
Aurtengo ordenantza fiskaletan bost neurri nagusi hartu ditu udal gobernu taldeak, eta joan den astearteko udalbatzarrean hasierako onespena eman zitzaien. Higiezinen, uraren eta garraio publikoaren izozketez gain, etxebizitza hutsei %100eko gainkargua ezarriko diete, alokairua sustatzeko helburuarekin. Herrian 1.500 etxebizitza huts daudela jakinarazi zuen Txaskok.
Komertzio txikien jarduera ekonomikoa bultzatzeko asmoz, irekitzeko lizentziak ez dituzte igoko, %33ko hobariak ezarriko dituzte obrak egiten dituztenen kasuan, azoka txikiak izoztuko dituzte eta azkenik, mahaitxoak jartzearen gaineko tarifak %1,5 igoko dituzte.
Horrez gain, jarduera ekonomikoaren gaineko zerga ez dute aldatuko, eta enplegua sustatze aldera, kontratu finkoak egiten dituztenei %5etik %20rako hobaria egingo zaie, eta kooperatibei %50ekoa.
Ibilgailuei azkenik, 12 zaldi baino gutxiago dituztenei tarifak izoztuko dizkiete, eta gutxiago isurtzen dituztenentzako hobariak izango dira.
Gainontzeko ordenantzetan %3ko igoera onartu dute, urteko azken batez bestekoan (iraileko %3,4) oinarrituta.
