Garaipena eskuratu dute Allerruko talde guztiek asteburuan
Garaipena eskuratu dute Allerruko talde guztiek asteburuan
Lanak bikain egin dituzte azken jardunaldian Lezoko kirol taldeek. Guztiek garaipena lortu dute, eta batzuen kasuan, sailkapen nagusian gora egiteko balio izan diete garaipenek.
Hori da Allerruko Erregional Preferente Mailako mutilen kasua. Garaipena eskuratu zuten ostegunean, gol bakarreko aldearekin. Zuri-berdeek 3-2 gainditu zituzten Santo Tomas Lizeoko mutilak. Horrenbestez, osteguneko partidaren ondoren, postu bat gora egin du sailkapen nagusian Lezoko taldeak, eta une honetan laugarrena da taulan hamasei punturekin, Vasconia, Martutene eta Astigarragako Mundarro taldeen atzetik.
Datorren jardunaldian Usurbilen kontra jokatuko dute Erregional Preferente Mailakoek, etxetik kanpo. Usurbil zazpigarrena da sailkapen taulan.
Emakumeek, 2-1
Allerruko emakumeek garaipena lortu zuten, berriz ere, osteguneko partidan, eta hirugarren jarraitzen dute Gipuzkoako Emakumeen Ligako sailkapen nagusian, hamabi punturekin. Allerrukoek 2-1 garaitu zituzten Intxaurdi taldekoak Lezoko Plazetan.
Hurrengo partida Urolaren kontra dute, datorren igandean. Urolakoak hamargarrenak dira taulan.
Lehen Erregionaleko Allerru B taldekoak izan dira partidarik jokatu ez duten bakarrak. Izan ere, atseden hartu dute asteburuan jokatutako jardunaldian. Hurrengoan, berriz, Beti Onaren kontra jokatuko dute Allerru B-koek etxean.
Areto futbolekoak ongi
Areto futbolari dagokionez, Beraungo frontoian ongi aritu ziren joan den larunbatean Allerru-Jaizkibelekoak, eta garaipena zakuan itzuli ziren etxera. 4-6 garaitu zuten Gamon taldea.
Hurrengo jardunaldian Bide-Bide Laskurainen kontra ariko dira, nor baino nor. Allerru-Jaizkibel taldea zazpigarrena da sailkapenean, zortzi punturekin, eta Bide Bide Laskurainekoak, berriz, bigarren lekuan daude, hamar punturekin.
Saskibaloian, 86-66
Aurreko jardunaldian garaipenik gabe itzuli baziren ere, azkenekoan lan txukuna egin dute etxean Allerru saskibaloi taldeko mutilek. Bekoerrota kiroldegian jokatu zuten partida joan den ostiralean, eta 86-66 garaitu zuten Soraluze-Bergara taldea. Allerruko mutilak zortzigarrenak dira sailkapenean.
Hurrengo jardunaldian, Gipuzkoako Lehen Mailako zazpigarrenean hain zuzen ere, DKS taldearen kontra ariko dira Allerruko mutilak. DKS, Allerru baino bi postu gorago dago sailkapenean, puntu bat gehiagorekin.
